Мода оламининг ўзига яраша тош-тарозиси ва қийинчиликлари бор. Ташқаридан қараганда ушбу оламни забт этгандек кўринган ва муваффақият борасида ҳавас қилса арзигулик дизайнерлар эса ҳамиша ҳам бундай юк ва босимни кўтара олмайди.
Маурицио Гуччи
1983 йилда Gucci модалар уйининг асосчиси Рудольфо Гуччи вафот этганидан кейин унинг акциялари ўғли Маурициога ўтган. 1993 йилга келиб эса мода уйи банкрот ёқасига келгани сабаб Маурицио акцияларини Investcorp компаниясига сотиб юборган. Шундан кейин Гуччилар оиласининг мода уйига умуман алоқаси қолмаган. 1997 йилга келиб 45 яшар Маурицио отиб ўлдирилган. Аввалига унинг ўлимига мафия алоқадор деб ўйланган, кейин эса унинг ўлимини рафиқаси Патриция буюртма қилгани аниқланган. Эрининг ёш жазмани бор эканидан хабар топган Патриция унинг уйланишидан қўрқиб, қизларининг меросдан бебаҳра қолмаслиги учун мазкур ишга қўл ургани маълум бўлган ва 29 йилга озодликдан маҳрум қилинган.
Александр Маккуин
Central St Martin’s коллежини битирган Александр фаолиятини эркин йўналишда ижод қиладиган рассом сифатида бошлаган. Бу вақтда унинг мода кўргазмалари театрни эсга солган. 1996 йилда Givenchy модалар уйини креатив раҳбари лавозимини эгаллаган ва ҳамкорликка нуқта қўйилганидан кейин Alexander McQueеn номли ўз брендига асос солган. Аммо мода саноатидаги босим ва ритмни кўтара олмаган дизайнер, 2010 йилнинг 11 февраль куни Лондондаги хонадонида ўлик ҳолда топилган. У дўсти Изабелланинг ўлимидан 3 йил, онасининг ўлимидан эса 3 кун ўтиб вафот этган.
Коко Шанель
Chanel модалар уйи асосчиси нафақат ўз исмини, балки мода оламини ҳам ўзгартириб юборган. Айнан у аёлларга корсетдан бошқа жакет, қора калта кўйлак, йирик тақинчоқ тақиш мумкинлигини ўргатган. Кўплаб дизайнерлар ҳасад қиладиган, муваффақиятли карьера эгаси бўлган Шанелнинг тақдири ҳам ҳавас қиладиган эмас. Синглиси билан бирга етимхонада катта бўлган Коко француз офицери Этен Балсан, кейинроқ эса инглиз тадбиркори Артур Кейпел билан учрашган. Артурнинг 1919 йил автоҳалокатда вафот этгани Шанель ҳаётида салбий из қолдирган ва унинг ўлимидан кейин турмушга чиқмаган. У нацистларга ёрдам беришда айбланиб, қамоққа олинган ва 1944 йилда Францияни тарк этиш шарти билан озодликка чиқарилган. Шундан кейин Швейцарияга кўчиб борган дизайнер у ерда 1953 йилгача яшаган. 1954 йилда эса 71 яшар Габриэль янги коллекцияси билан мода оламига қайтган. Шанель 87 ёшида узоқ вақт ёлғиз яшаган меҳмонхонада юрак хуружидан вафот этган.
Жанни Версаче
Мижозлари орасида малика Диана, Мадонна ва бошқа кўплаб юлдузлар бўлган дизайнер 1997 йилда ўз яхтасида, полиция қуршаб олган бир вақтда қотил Эндрю Кьюненен томонидан отиб ўлдирилган.
Ив Сен-Лоран
Мода оламига ўзига хос ҳисса қўшган Ив Генри Донат Мэтттю Сен-Лоран 1936 йил Алжирда дунёга келган. 17 ёшида ёш дизайнерлар танловида қатнашган Ив 21 ёшида Кристиан Диор билан танишади ва унга шогирд тушади. Орадан 5 йил ўтиб, Yves Saint Laurent модалар уйини очади ва унга умрининг 40 йилини бағишлайди. 2002 йилга келиб модани тарк этишини билдиради ва шу муносабат билан эсда қоларли дефиле ўтказади. Шундан кейин у кучуги билан бирга уйга қамалиб, мия саратони билан курашмоқчи бўлади. Парижга даволаниш учун борган вақти — 71 ёшида ҳаётдан кўз юмади.
Изоҳ (0)