Қишки либосга бошқаларига қараганда кўпроқ талаб қўйилиши табиий. Улар ўз ўрнида иссиқ, қулай ҳамда тенденцияга мос бўлиши зарур. Аммо уларнинг орасидан унутиш керак бўлганлари ҳам талайгина.
1. Ёрқин рангда тўқилган шапкалар
Қулоқчали, думли, турли хил гуллар билан безатилган ёрқин шапкалар очиқчасига кулгили кўринади. Бундай қувноқ бош кийимлар кўпроқ ёш болалар, айниқса, боғча ёшидаги кичкинтойлар ёшига мос келади. Айни мавсумда қизлар учун кўпроқ босиқ ва бир хил рангдаги нафис шапкалар кийиш тавсия этилади.
2. Бармоқсиз тўқилган қўлқоплар
Бу каби қўлқопларнинг вазифаси деярли натижасиз. Унда бармоқлар совқотади, қизаради, кўкаради. XVIII асрда кўча савдогарлари томонидан қўлланилган ушбу қўлқоплар асосан пул санашга қулайлик туғдириш мақсадида фойдаланилган. Аммо кейинчалик урфга кирган. Лекин ҳозирда иссиқ, бармоқлари бутун бўлган қўлқоп кийиш мақсадга мувофиқ.
3. Шаҳар кўчаларида «угги»лар
Иссиқ ҳамда ясси этиклар шаҳар учун мўлжалланмаган. Шунингдек, қорли ва нам ҳаволар учун ҳам унчалик мос эмас. Аммо ушбу маълумотлар уни киювчи хонимларни қизиқтирмайди ва улар ҳамон савдо дўконларидан харид қилинмоқда.
4. Оқ рангли этик
Қиш мавсумида яна бир воз кечиш керак бўлган оёқ кийимлардан бири оқ этикдир. Қачонлардир уни кийиш аёллар орасида урфга кирган бўлсада, лекин мода олами мутахассислари буни ҳеч қачон ёқламаган. Шунингдек, оқ рангдаги этиклар ҳеч қандай либос билан тўғри келмайди.
5. Мўйнали нимча
Мўйнали нимчалар қишнинг совуқ кунларида кийишга тўғри келмайдиган яна бир либосдир. Сабаби у танани бутунлай иситмайди, шунчаки чиройли безак вазифасини бажариши мумкин холос. Бу каби бичимдаги нимчаларни кийганлар ўз соғлигини хавф остига қўйиши шубҳасиз.
6. Тери рангли колготки
Қишда ҳам гўзалликни биринчи ўринга қўядиган аёллар баданранг колготка кийишни афзал деб билади. Бу, албатта, атрофда иссиқ ва қалин кийинган одамлар орасида хунук кўринади. Шунингдек, ушбу юпқа колготкалар ҳеч қачон оёқларни иситмаслиги ҳам ҳаммага маълум. Шунчаки, қизлар кўриниши учун саломатликнинг қадрига вақтида етмайди.
7. Ёрқин рангдаги турли нақшли курткалар
Куртка танлашда рангига ва туширилган нақшларга эътиборли бўлиш зарур. Сабаби уни ҳар қандай жойга кийиш мумкин бўлиши ва одамлар орасида унчалик ҳам эътиборни тортмаслиги керак.
8. Павлопосад рўмоллари
Ўтган аср аёлларининг асосий безаги ҳисобланган ушбу рўмоллар ҳозирда ҳам айрим қизлар томонидан янгича услубда фойдаланилади. Эндиликда рўмол бошга эмас, бўйинга шарф ўрнига ўралмоқда. Лекин бу каби рўмоллар кўпроқ классик услубдаги либослар ва айнан ўтган асрнинг модаларига тўғри келади.
9. Жинси ва узун этик
Жинси ва узун этик комбинацияси бундан 10 йил аввал ҳам урфда эди. Лекин моданинг тинимсиз ўзгариб туриши натижасида энди жинси шимлар билан калта ва қулай этиклар кийган маъқул.
10. Шапка ва қўлқоп тўплами
Шапка ва қўлқоп тўплами бироз зерикарли кўриниши шубҳасиз. Унинг ўрнига алоҳида харид қилинган шапкага шунчаки мос келувчи қўлқопни уйғунлаштириш анча чиройли кўриниш беради. Мода ихлосмандлари орасида тўпламларга бўлган талаб аввалгига қараганда анча сусайган.
Изоҳ (0)