Moda olamining o‘ziga yarasha tosh-tarozisi va qiyinchiliklari bor. Tashqaridan qaraganda ushbu olamni zabt etgandek ko‘ringan va muvaffaqiyat borasida havas qilsa arzigulik dizaynerlar esa hamisha ham bunday yuk va bosimni ko‘tara olmaydi.
Mauritsio Guchchi
1983-yilda Gucci modalar uyining asoschisi Rudolfo Guchchi vafot etganidan keyin uning aksiyalari o‘g‘li Mauritsioga o‘tgan. 1993-yilga kelib esa moda uyi bankrot yoqasiga kelgani sabab Mauritsio aksiyalarini Investcorp kompaniyasiga sotib yuborgan. Shundan keyin Guchchilar oilasining moda uyiga umuman aloqasi qolmagan. 1997-yilga kelib 45 yashar Mauritsio otib o‘ldirilgan. Avvaliga uning o‘limiga mafiya aloqador deb o‘ylangan, keyin esa uning o‘limini rafiqasi Patritsiya buyurtma qilgani aniqlangan. Erining yosh jazmani bor ekanidan xabar topgan Patritsiya uning uylanishidan qo‘rqib, qizlarining merosdan bebahra qolmasligi uchun mazkur ishga qo‘l urgani ma’lum bo‘lgan va 29 yilga ozodlikdan mahrum qilingan.
Aleksandr Makkuin
Central St Martin’s kollejini bitirgan Aleksandr faoliyatini erkin yo‘nalishda ijod qiladigan rassom sifatida boshlagan. Bu vaqtda uning moda ko‘rgazmalari teatrni esga solgan. 1996-yilda Givenchy modalar uyini kreativ rahbari lavozimini egallagan va hamkorlikka nuqta qo‘yilganidan keyin Alexander McQueеn nomli o‘z brendiga asos solgan. Ammo moda sanoatidagi bosim va ritmni ko‘tara olmagan dizayner, 2010-yilning 11-fevral kuni Londondagi xonadonida o‘lik holda topilgan. U do‘sti Izabellaning o‘limidan 3 yil, onasining o‘limidan esa 3 kun o‘tib vafot etgan.
Koko Shanel
Chanel modalar uyi asoschisi nafaqat o‘z ismini, balki moda olamini ham o‘zgartirib yuborgan. Aynan u ayollarga korsetdan boshqa jaket, qora kalta ko‘ylak, yirik taqinchoq taqish mumkinligini o‘rgatgan. Ko‘plab dizaynerlar hasad qiladigan, muvaffaqiyatli karyera egasi bo‘lgan Shanelning taqdiri ham havas qiladigan emas. Singlisi bilan birga yetimxonada katta bo‘lgan Koko fransuz ofitseri Etyen Balsan, keyinroq esa ingliz tadbirkori Artur Keypel bilan uchrashgan. Arturning 1919-yil avtohalokatda vafot etgani Shanel hayotida salbiy iz qoldirgan va uning o‘limidan keyin turmushga chiqmagan. U natsistlarga yordam berishda ayblanib, qamoqqa olingan va 1944-yilda Fransiyani tark etish sharti bilan ozodlikka chiqarilgan. Shundan keyin Shveysariyaga ko‘chib borgan dizayner u yerda 1953-yilgacha yashagan. 1954-yilda esa 71 yashar Gabriel yangi kolleksiyasi bilan moda olamiga qaytgan. Shanel 87 yoshida uzoq vaqt yolg‘iz yashagan mehmonxonada yurak xurujidan vafot etgan.
Janni Versache
Mijozlari orasida malika Diana, Madonna va boshqa ko‘plab yulduzlar bo‘lgan dizayner 1997-yilda o‘z yaxtasida, politsiya qurshab olgan bir vaqtda qotil Endryu Kyunenen tomonidan otib o‘ldirilgan.
Iv Sen-Loran
Moda olamiga o‘ziga xos hissa qo‘shgan Iv Genri Donat Metttyu Sen-Loran 1936-yil Aljirda dunyoga kelgan. 17 yoshida yosh dizaynerlar tanlovida qatnashgan Iv 21 yoshida Kristian Dior bilan tanishadi va unga shogird tushadi. Oradan 5 yil o‘tib, Yves Saint Laurent modalar uyini ochadi va unga umrining 40 yilini bag‘ishlaydi. 2002-yilga kelib modani tark etishini bildiradi va shu munosabat bilan esda qolarli defile o‘tkazadi. Shundan keyin u kuchugi bilan birga uyga qamalib, miya saratoni bilan kurashmoqchi bo‘ladi. Parijga davolanish uchun borgan vaqti — 71 yoshida hayotdan ko‘z yumadi.
Izoh (0)