Бош кийимлар учун талаб бошқа нарсалар сингари кийимнинг маълум бир элементига бўлган муҳаббатидан бошланган. Орадан йиллар ўтсада, уларга бўлган талаб ва танлашдаги қонун-қоида ўзгаришсиз қолди.
ХХ асрдаги бош кийимлар тури ҳозирда ҳар қандай одамни ҳайратга солиши мумкин: клош, гаучо, ток, феска, котелок, федора, трилби, каноте, тирол шапка ва бошқалар. XXI асрга келиб аёлларга бош кийим танлашда бироз енгилликлар пайдо бўлди. Сабаби уларнинг бир неча тури ўз-ўзидан урфдан қолди.
Аммо бугунги кунга келиб сандиқда қолиб кетган бош кийимлари яна урфга кирмоқда. Бундай тенденцияни нафқат подиумларда, балки шаҳар кўчаларида ҳам учратиш мумкин. Асосан 15 ёшдан 45 ёшгача бўлган аёлларнинг аксарияти бош кийимдан фойдаланишни афзал кўради.
Унга кўра, спорт услубида кийинган аёллар трикотаж бош кийимларини, баланд пошна ва мўйна кийган хонимлар эса классик услубдаги бош кийимларида кўриш мумкин. Бош кийим асосан юз шаклига кўра танлангани мақсадга мувофиқ. Шундагина унинг ярашгани ёки аксинча бўлиши мумкинлиги вақтида аён бўлади.
Думалоқ юз
Юзнинг юқори қисмини очиқ қолдирувчи шляпа ва шапкалар силуэтни визуал равишда чўзади ва нисбатларни мувозанатлаштиради. Думалоқ юз эгалари тўқилган шапкалар, бошга ассиметрик тарзда ўрнатиладиган козирокли шапкалар, ён томонга кийиладиган беретлар, юмшоқ шляпалар, қулоқли шапкалардан фойдаланиши мумкин. Лекин улар учун кичкина ва жуда тор, таблетка шаклидаги шляпа, банданлар дейрали тўғри келмайди.
Узунчоқ юз
Узунчоқ юз хонимлари учун «трилби» услубидаги классик шляпалар тавсия этилади. Шунингдек, козироги жуда катта бўлмаган кепкалар, пешонани ёпиб турувчи ҳажман катта беретлар, «гаучо»га ўхшаш кенг айланали шляпаларни ҳам кийиши мумкин. Аммо улар пешонани тўлиқ ёпувчи ва бўйни баланд кўрсатувчи шлаяпалардан воз кечиш керак. Шу билан бирга тўқилган шапкалар доим ҳам ярашавермаслиги мумкин.
Учбурчак юз
Пешонаси иягига нисбатан кенг аёлларга ассиметрик тарзда кийиладиган беретлар жуда ярашади. Шунингдек, ўта катта бўлмаган зич тўқилган шапкалар ҳамда қулоқчали бош кийимлар ҳам тавсия этилади. Бундай вазиятда кенг пешона ва кичкина жағга мос келувчи бош кийими танлашни унутмаслик керак. Шунинг учун ҳам учбурчак юз шакли учун шапка танлаш бироз нозик масала. Сабаб ҳар қандай бош кийими пешона қисмни янада катта кўрсатиши мумкин. Зич тўқилган кенг бош кийимларидан эса воз кечган маъқул.
Тўртбурчак юз
Кўпинча ушбу шаклдаги юзларнинг яноқ суяги кўзга ташланади. Уларни яшириш учун пешона қисмини бироз очиқ қолдирадиган, орқа томонга тушириладиган трикотаж шапкалар мос келади. Қулоқларга тушиб турувчи шлаяпалар ҳам юзни янада ихчам кўрсатади. Қулоқлари орқага боғланадиган мўйнали шапкалар тўртбурчак юзли хонимлар учун айни муддао. Кенг бош кийимлари ва пешона бутунлай тўсиб турувчи шапкалар тўртбурчак юзли аёлларга тавсия этилмайди.
- Бош кийимларни танлашда нафақат устки кийим ёки юз шакли, балки бутун бошли қомат ҳам инобатга олиниши зарур.
- Кенг айланали шляпалар баландлиги ўртачадан кам бўлмаган қизлар учун мос келади.
- Баланд бўйли тўлишган қизлар учун тор ва ихчам шляпалар мос келади.
- Озғин ва узун бўйли аёлларда ҳар қандай шаклдаги кенг бош кийимлар чиройли кўринади.
- Бўйи паст хонимлар эса кенг ва катта шапкалардан узоқроқ бўлгани маъқул.
Изоҳ (0)