Наманган вилояти Халқ депутатлари кенгашида Уйчи тумани ҳокими Муҳаммадаюбхўжа Апақовнинг 2020 йилда ижтимоий-иқтисодий соҳаларда амалга оширилган ишлар ва 2021 йил режаси ҳақида ҳисоботи эшитилди. Бу ҳақда «Xabar.uz» хабар берди.
Ҳисоботда келтирилишича, пандемия шароитида кўплаб меҳнат мигрантлари ватанга қайтиб келган. Уларни бандлик билан таъминлаш ишлари олиб борилмоқда. Таъкидланишича, Уйчи тумани Наманган шаҳри билан чегарадош бўлгани учун аҳоли шаҳарда ҳам ишлайди.
Маълумотларга кўра, ҳозирда 4200 нафар уйчилик меҳнат муҳожири хорижда ишламоқда. ИИБга уларнинг ҳолидан хабар олиш ва ойига 200 АҚШ долларидан кам пул юбораётганларни Ўзбекистонга қайтариш топшириғи берилган. Улар шу ерда иш билан таъминланади.
Қайд этилишича, хорижга кетиш истагида бўлганларга ёрдам берилиб, бепул ўқитилмоқда, Россия ва Қозоғистондагиларни кафолатланган иш ўрни билан таъминлаш бўйича музокара ўтказилмоқда.
«Яқинда Россиядан ўн мингта иш ўрнига таклиф келди. Энг катта муаммо — тил ва касб билмаслик бўлиб турибди. Кимдир тумандан четга чиқадиган бўлса, аввало, касб ва ҳунарга ўргатиш лозим», — дейди Уйчи ҳокими.
Шунингдек, туман ҳокими Уйчида ички туризмни ривожлантириш, фермерлар учун пахтага белгиланган нарх паст экани муаммо келтириб чиқараётгани, Норин дарёсидан иқтисодий мақсадлар йўлида самарали фойдаланиш мумкинлиги тўғрисидаги ўз фикр-мулоҳазаларини билдириб ўтган.
Аввалроқ Ўзбекистонга 2020 йилнинг ўтган 11 ойи мобайнида 467 минг нафардан ортиқ меҳнат мигрантлари қайтиб келгани маълум бўлганди.
Изоҳ (0)