Namangan viloyati Xalq deputatlari kengashida Uychi tumani hokimi Muhammadayubxo‘ja Apaqovning 2020-yilda ijtimoiy-iqtisodiy sohalarda amalga oshirilgan ishlar va 2021-yil rejasi haqida hisoboti eshitildi. Bu haqda “Xabar.uz” xabar berdi.
Hisobotda keltirilishicha, pandemiya sharoitida ko‘plab mehnat migrantlari vatanga qaytib kelgan. Ularni bandlik bilan ta’minlash ishlari olib borilmoqda. Ta’kidlanishicha, Uychi tumani Namangan shahri bilan chegaradosh bo‘lgani uchun aholi shaharda ham ishlaydi.
Ma’lumotlarga ko‘ra, hozirda 4200 nafar uychilik mehnat muhojiri xorijda ishlamoqda. IIBga ularning holidan xabar olish va oyiga 200 AQSh dollaridan kam pul yuborayotganlarni O‘zbekistonga qaytarish topshirig‘i berilgan. Ular shu yerda ish bilan ta’minlanadi.
Qayd etilishicha, xorijga ketish istagida bo‘lganlarga yordam berilib, bepul o‘qitilmoqda, Rossiya va Qozog‘istondagilarni kafolatlangan ish o‘rni bilan ta’minlash bo‘yicha muzokara o‘tkazilmoqda.
“Yaqinda Rossiyadan o‘n mingta ish o‘rniga taklif keldi. Eng katta muammo — til va kasb bilmaslik bo‘lib turibdi. Kimdir tumandan chetga chiqadigan bo‘lsa, avvalo, kasb va hunarga o‘rgatish lozim”, — deydi Uychi hokimi.
Shuningdek, tuman hokimi Uychida ichki turizmni rivojlantirish, fermerlar uchun paxtaga belgilangan narx past ekani muammo keltirib chiqarayotgani, Norin daryosidan iqtisodiy maqsadlar yo‘lida samarali foydalanish mumkinligi to‘g‘risidagi o‘z fikr-mulohazalarini bildirib o‘tgan.
Avvalroq O‘zbekistonga 2020-yilning o‘tgan 11 oyi mobaynida 467 ming nafardan ortiq mehnat migrantlari qaytib kelgani ma’lum bo‘lgandi.
Izoh (0)