Ўзбекистонда Президент ташаббуси билан амалга оширилаётган «Обод қишлоқ» дастури натижасида янги қиёфага кирган юзлаб маҳалла ва қишлоқлар қаторидан энди «Эшонобод» қишлоғи ҳам жой олди.
Ушбу қишлоқ Тошкент вилояти маркази Нурафшон шаҳридан 80 километр, Чиноз тумани марказидан 20 километр олисда, қўшни давлат билан чегара ҳудудда жойлашган.
Амалга оширилган кенг кўламли бунёдкорлик ишлари туфайли бу ерда яшаётган қарийб 3 минг нафардан зиёд аҳоли ҳаётида сезиларли ўзгаришлар юз берди. Қишлоқда 2020 йилда қурилиш-таъмирлаш, ободонлаштириш ва кўкаламзорлаштириш ишлари олиб борилди.
Хусусан, қишлоқнинг Файзобод кўчасида замонавий маҳалла маркази қад ростлади. Марказда маҳалла фуқаролар йиғини раиси, унинг ўринбосари ва турли йўналишлар бўйича маслаҳатчилари, профилактика инспектори ўзаро уйғун ва самарали фаолият кўрсатиши учун барча шароит яратилган.
Шунингдек, кутубхона ва мутолаа зали, тумандаги Халқ қабулхонаси, Давлат хизматлари марказининг шохобчалари, 3-сектор штаби, тиббиёт пункти, банк филиали каби одамларга хизмат қиладиган объектлар ташкил этилган.
Янги объектларни фойдаланишга топширишга бағишланган тадбирларда Давлат ва жамоат ташкилотлари, миллий маданий марказлар вакиллари жам бўлган ушбу тадбирларда Россия, Қозоғистон, Қирғизистон, Тожикистон республикаларининг Ўзбекистондаги элчилари ҳам иштирок этган.
Қишлоқда янги барпо этилган 200 ўринли маданият саройида машғулотларни бошлаб юборган эшонободлик санъацевар ёшлар меҳмонларни ўзларининг ижод намуналари билан кутиб олган.
Ёшларнинг китобхонлик маданиятини юксалтириш, дам олиш шароитларини яхшилаш учун «Китобхонлар боғи» барпо этилди. Бу хиёбон Ўзбекистон ва жаҳондаги энг нодир меъморий обидаларнинг ихчам макетларини ўзида мужассам этган.
Аҳолини, айниқса, хотин-қизларни иш билан таъминлаш мақсадида замонавий тикув корхоналари қурилди, унда икки сменада 500 нафар хотин-қиз ишлайди. Шу ерда хотин-қизларга тикиш-бичиш сир-асрорини ўргатувчи 200 ўринли замонавий ўқув маркази ҳам иш бошлаган. Корхона ойига 6 минг дона кийим-кечак тайёрлаш қувватига эга.
Изоҳ (0)