Ҳозир бошланг: Янги йилгача озишга ёрдам берадиган 7 тавсия

Бирданига тез озиб бўлмайди, аммо кичик ва оддий уринишлар муваффақиятга эришишга ёрдам бериши мумкин. Қуйидаги тавсияларни одат тарзига киритиш ва доимий эканлигига эътибор қаратилса, тез орада ижобий натижага эришиш мумкин бўлади.

Кичик ҳаракатлардан бошланг

Аксари ҳолларда озмоқчи бўлган киши бирваракайига спорт билан шуғулланмоқчи, тўғри овқатланмоқчи ва спиртли ичимликлардан воз кечмоқчи бўлади. Буни уддасидан чиқса яхши албатта, лекин кўпинча ҳаммасига риоя қилиш қийин бўлади. Шу сабаб ҳам парҳезшунослар кичик уринишдан, бир кунда бир ўзгаришни амалга оширишдан бошлашни тавсия қилади. Масалан, тонгда оқсилларга бой нонушта тайёрланг ёки иш вақти тугаганидани сўнг бир муддат тоза ҳавода сайр қилинг. Тиниқиб ухлашни ҳам фойдали одатлар сирасига киритиш мумкин.

Сув ичишни канда қилманг

Уйғониш билан бир стакан сув ва нонуштадан кейин 1 финжон қаҳва ичиш оддий, аммо метаболизм яхшиланишига ҳисса қўшадиган одат ҳисобланади. Тунда бир стакан сув тайёрлаб қўйинг ва уйқудан кўзингизни очишингиз билан уни истеъмол қилинг. Бу орқали сиз организмнинг тунда йўқотган намлигини қоплаш ва моддалар алмашинуви яхшиланишига кўмак берган бўласиз. Қаҳва эса озишда самара берадиган энг яхши ичимликлардан ҳисобланади.

Ёнғоқ истеъмол қилинг

Ёнғоқ калориянинг кони бўлишига қарамай, оздириш хусусиятига эга. Бунга тўлиқ ва соғлом моддалар алмашинуви учун зарур бўлган фойдали ёғлар борлиги, шунингдек, қоринни тўқ тутиши сабаб бўлади.

Олма ейишни унутманг

Олма ва нок таркибидаги пектин клетчаткаси очлик ҳиссига таъсир кўрсатади. Тушликни олма билан якунлаш, қориннинг узоқ вақт давомида тўқ бўлиши гарови.

Етарлича овқатланинг

Озмоқчи бўлсангиз, оч қолмасликка ҳаракат қилинг. Чунки калория етишмаганда метаболизм секинлашади, калория энергияга эмас ёғга айланади. Шу сабаб ҳам калорияни табиий ва фойдали маҳсулотлар таркибида қабул қилиш керак.

Тиниқиб ухланг

Узоқ вақт, тиниқиб асосийси эса тўғри ухланг. Бунинг учун хонангиз шамоллатилган ҳамда гаджетларингиз сиздан узоқда бўлиши керак. Қанча тиниқиб ухласангиз, метаболизм шунчалик яхши бўлади.

Тарелкангизни алмаштиринг

Овқат егандан кейин тўйганлик ҳақидаги сигнал мияга кечикиброқ етиб боради ва шу сабаб ҳам очлик ҳисси қонмади деб кўпроқ танаввул қилиш ҳолати кузатилади. Керагидан ортиқ еб юбормаслик учун эса овқатни кичик ўлчамли тарелкага сузиш тавсия қилинади. Идишнинг кичик бўлиши кўп танаввул қилмасликни 7 фоизга камайтиради.