Бухоро вилоятининг Жондор туманида ҳамқишлоғининг Damas’ини яширин равишда олиб қочган шахс қўлга олинди ва унга нисбатан жиноят иши қўзғатилди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, 2020 йилнинг 12 декабрь куни кечки пайт Жондор тумани ички ишлар бўлимининг навбатчилик қисмига туманнинг «Далмунобод» маҳалласида яшовчи 24 ёшли фуқаро У.Д.дан мурожаат келиб тушган. Мурожаатга кўра, туман марказий деҳқон бозори олдида қолдириб кетилган оқ рангли Damas номаълум шахс томонидан ўғирлаб кетилган.
Мазкур хабар юзасидан вилоят ИИБ, Жондор тумани ИИБ, тегишли соҳавий хизматлар ҳамда барча шаҳар ва туманларда тергов-тезкор гуруҳлари тузилган.
Вилоят бўйлаб «Тўсиб ушлаш» махсус тезкор тадбири амалга оширилган.
Олиб борилган тезкор суриштирув ҳаракатлари давомида олиб қочилган Damas шу куннинг ўзида топилган. Автомашина Бухоро шаҳрининг Қаюм Муртазоев кўчасида жойлашган марказий дорихона ёнида қолдириб кетилгани аниқланган.
Шундан сўнг автомашинани олиб қочган шахсни қидириб топиш борасида тезкор қидирув ҳаракатлари олиб борилган ва жиноятни содир қилган шахс қўлга олинган.
Маълум бўлишича, жиноятни жабрланувчига таниш бўлган фуқаро А.А. спиртли ичимлик ичиб, маст ҳолатда олиб қочгани аниқланган.
Ҳозирда А.А.га нисбатан Жондор туман ИИБ ҳузуридаги тергов бўлинмаси томонидан Жиноят кодексининг 267-моддаси (Транспорт воситасини олиб қочиш) 1-қисми билан жиноят иши қўзғатилган. Дастлабки тергов ҳаракатлари олиб борилмоқда.
«Жиноят содир этилишига автомашина катта йўл ёқасида, тахминан, икки соат мобайнида, жабрланувчининг эътиборсизлиги, машина ён ойналарининг очиқ ҳолда калити билан қаровсиз қолдириб кетилгани сабаб бўлган», — дейди Шуҳрат Жалолов.
Изоҳ (0)