Ўзбекистон товар-хом ашё биржасида цемент ва шакар нархлари кўтарилди

Ўзбекистон товар-хом ашё биржасида 7–13 декабрь кунлари барча савдо платформаларида 1,132 триллион сўмлик товарлар сотилган бўлиб, бу аввалги ҳафтага нисбатан 9,1 фоизга кўпроқ ҳисобланади. Мазкур даврда очиқ биржа савдолари орқали жами 962,5 миллиард сўмлик товар ресурслари сотилди. Бу ҳақда биржа матбуот хизмати хабар берди.

Ўтган ҳафтада биржа савдоларига 6 197 тонна пахта ёғи қўйилди ва ундан 3 302 тоннаси, яъни 53,3 фоизи сотилди. Ўтказилган савдоларда ҳар куни ўртача 89 нафар харидор иштирок этди.

Кўриб чиқилаётган даврда барча навли пахта ёғининг кунлик ўртача нархлари маҳсулотнинг бир тоннаси учун 13 502 700 сўмдан 12 728 600 сўмгача, яъни 5,7 фоизга пасайди. Ҳафта якунларига кўра 1-навли пахта ёғининг ҳафталик котировкаси маҳсулотнинг бир тоннаси учун 13 224 900 сўмни ташкил этди.

Биржанинг шакар бозорида айрим ўзгаришлар қайд этилди. Ҳафта давомида биржа савдоларига 3 382 тонна шакар қўйилди ва улардан 3 265 тоннаси, яъни 96,5 фоизи сотилди.

Шакарнинг барча категорияси бўйича ўртача бошланғич нархлар аввалги ҳафтага нисбатан маҳсулотнинг бир тоннаси учун 6 780 000 минг сўмгача ёки 4,5 фоизга сотувчи корхоналар томонидан кўтарилди. Шу муносабат билан, шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 6 782 200 сўмдан 6 803 500 сўмгача, яъни 0,3 фоизга кўтарилган. Ўтказилган биржа савдолари натижасида маҳаллий шакарнинг 3-категорияси бўйича шаклланган ўртача ҳафталик нархи маҳсулотнинг бир тоннаси учун 6 791 600 сўмни ташкил этди.

Ўтган ҳафта мобайнида биржа савдоларига 101 127 тонна цемент қўйилди ва шундан 89 999 тоннаси, яъни 89 фоизи сотилди. Шу билан бирга, биржа савдоларига қўйилаётган цемент ҳажмининг пасайганлиги сабабли, унинг ўртача кунлик сотув ҳажмлари ҳам аввалги ҳафтага нисбатан камайиб, ўртача кунлик сотув ҳажмлари 22,5 минг тоннани ташкил қилди.

Кўриб чиқилаётган даврда цементнинг барча маркалари бўйича шаклланган кунлик ўртача бошланғич нархлари маҳсулотнинг бир тоннаси учун 461,4 минг сўмдан 501 минг сўмгача ёки 8,6 фоизга ўсган. Шу муносабат билан цементнинг барча маркалари бўйича шаклланган кунлик ўртача нархлари ҳам маҳсулотнинг бир тоннаси учун 538,6 минг сўмдан 597,8 минг сўмгача ёки 11 фоизга кўтарилган.

Аввалроқ Ўзбекистон товар-хом ашё биржасида 7–13 декабрь кунлари Аи-80 маркали автомобиль бензинининг ўртача бошланғич нархи 2,6 фоизга кўтарилгани ҳақида хабар берилганди.