Вазирлар Маҳкамасининг 2020 йил 14 декабрдаги «Электрон турдаги суғурта хизматларини кўрсатиш тартибини такомиллаштириш бўйича қўшимча чора-тадбирлар тўғрсида»ги қарори билан 2021 йил 1 мартдан бошлаб транспорт воситалари эгаларининг фуқаролик жавобгарлигини мажбурий суғурта қилиш бўйича E-polis’ни сотиш амалга оширилади.
Таъкидланишича, мазкур тизим кейинчалик бошқа мажбурий ва ихтиёрий суғурталарга ҳам жорий қилинади.
Қарор билан Молия вазирлиги, Ахборот технологиялари ва коммуникацияларини ривожлантириш вазирлиги ва Суғурта тўловларини кафолатлаш жамғармасининг электрон турдаги суғурта хизматларини ягона ахборот тизими таркибида амалга ошириш ҳақидаги таклифларига розилик берилган.
Белгиланишича:
- Молия вазирлиги суғурта ташкилотлари билан биргаликда 2021 йил 1 мартдан бошлаб транспорт воситалари эгаларининг фуқаролик жавобгарлигини мажбурий суғурта қилиш бўйича E-polis’ни сотиш, расмийлаштиришни амалга оширади;
- суғурта ташкилотлари томонидан хорижий давлатларда рўйхатдан ўтказилган ҳамда Ўзбекистон ҳудудида вақтинча фойдаланилаётган транспорт воситалари эгалари билан E-polis’ни расмийлаштиришга йўл қўйилмайди;
- E-polis қоғоз шаклидаги шартнома (полис)га тенглаштирилади;
- ягона ахборот тизими таркибида E-polis’ни расмийлаштириш бўйича тегишли ахборот модулларини ишлаб чиқиш ва жорий этишни молиялаштириш жамғарма ҳисобидан амалга оширилади.
Эслатиб ўтамиз, Ўзбекистон Президенти 28 сентябрда имзолаган қонун билан Маъмурий жавобгарлик тўғрисидаги кодекснинг 291-моддаси (транспорт воситаларини ушлаб туриш ва кўрикдан ўтказиш асослари ва тартиби)га тегишли ўзгаришлар киритилган бўлиб, янги тартиб кучга кирган. Унга кўра, Ўзбекистонда автомобилнинг суғуртаси йўқлиги учун жарима майдончасига жойлаштириш амалиёти бекор қилинган.
Изоҳ (0)