Ёшлар иттифоқи Жиззах шаҳридаги Ёшлар инновацион марказини қуриш ва реконструкция қилиш билан шуғулланиб, ҳақини тўлиқ ола олмаётган қурувчи билан боғлиқ муаммо ечим топганини маълум қилди, деб хабар бермоқда «Kun.uz».
Тадбиркор Шуҳрат Сотволдиевнинг маълум қилишича, «Ёшлар қурилиш инвест» МЧЖ ҳамда «Жиззах реал қурилиш таъмир» МЧЖ ўртасида 14 декабрь куни «Келишув битими» имзоланган. Янги битимга кўра, тадбиркорнинг харажатлари 14,3 миллиард сўмдан 11,4 миллиард сўмга туширилган.
«Бугун ушбу ҳужжатлар асосида Ёшлар иттифоқи марказий кенгаши ва Жиззах вилояти ҳокимлиги томонидан 3,6 миллиард сўмлик маблағлар қоплаб берилди. Бунинг учун уларга миннатдорчилик билдираман, энди 300 дан ортиқ ишчи хизматчилар ўз иш ҳақларини оладиган бўлди.
Бу ҳолат бўйича ижтимоий тармоқларга чиқишимни маслаҳат берганлар ҳам бўлган эди. Асосийси, масала ечилди. Ўзбекистон Ёшлар иттифоқидан ҳеч қандай даъво эътирозим йўқ», — дея маълум қилган Шуҳрат Сотволдиев.
Эслатиб ўтамиз, «Жиззах Реал қурилиш таъмир» МЧЖ директори Шуҳрат Сотволдиев имзолаган хат сурати ижтимоий тармоқларда тарқалганди. Хатда тадбиркор Президент топшириғи ва бош вазирнинг биринчи ўринбосари Очилбой Раматов тасдиқлаган ҳужжатга ишониб, Ёшлар иттифоқи учун Жиззах вилоятида 14,3 миллиард сўмлик бинони деярли ўз ҳисобидан қургани қайд этилган. Бироқ у Ёшлар иттифоқидан мазкур маблағларни ола олмаётганини ва шу сабабли 15 декабрь куни иттифоқнинг марказий кенгаши биноси олдида очлик эълон қилмоқчи эканлигини баён қилганди.
Изоҳ (0)