Ўзбекистон Молия вазирлиги ҳузуридаги Пенсия жамғармаси матбуот хизмати мамлакат ҳудудида бир жойдан бошқа жойга кўчган, шунингдек, хорижга доимий яшаш учун кетган фуқароларга пенсия тўлаш тартиби ҳақида маълумот берди.
Пенсия олувчи шахс Ўзбекистон доирасида доимий яшаш учун бошқа туман (шаҳар)га кўчган тақдирда, манзил-колонияларда жазони ўтаётганда ёки манзил-колониядан озод этилганда, пенсия ҳужжатлар йиғмажилди почта орқали пенсионернинг янги яшаш жойи ёки манзил-колония жойлашган ердаги Пенсия жамғармаси бўлимига юборилади ёки пенсионернинг қўлига берилади.
Пенсия олувчи шахс бир туман (шаҳар) ҳудудида, шунингдек, Ўзбекистон ҳудуди доирасида бошқа туман (шаҳар)га доимий яшаш учун кўчиб кетганда пенсия аввалги яшаш жойи бўйича шахс рўйхатдан чиқарилган ойнинг охиригача тўланади.
Ушбу ҳолатда пенсияни тўлаш пенсия ҳужжатлар йиғмажилди олингандан кейин пенсия олувчи шахснинг янги яшаш жойи бўйича Пенсия жамғармаси бўлими томонидан давом эттирилади. Бунда пенсияни тўлаш унинг олдинги яшаш жойи бўйича пенсияни тўлаш тўхтатилган вақтдан бошлаб, бироқ у ҳисобга қўйиш мақсадида мурожаат этганидан олдинги ўн икки ойдан ошмаган давр учун давом эттирилади.
Ўзбекистон Республикаси пенсия таъминоти тўғрисида халқаро шартномалар тузган хорижий давлатга доимий яшаш учун кетилган кунгача тайинланган пенсия турар жойидан рўйхатдан чиққан ойнинг охиригача тўланади.
Ўзбекистон ташқарисига доимий яшаш учун кетаётган фуқароларга пенсияни тўлаш унинг аризаси ва «Доимий яшаш жойидан рўйхатдан чиқарилди» деган белги бўлган шахсини тасдиқловчи ҳужжат асосида тўхтатилиши мумкин.
Доимий яшаш учун хорижий давлатга кетишгача тайинланган пенсия (Ўзбекистон Республикаси пенсия таъминоти тўғрисида халқаро шартномалар тузган давлатлар бундан мустасно) Пенсия жамғармаси бўлимига кетиш тўғрисида ариза берилган кундаги пенсия миқдори ҳисоб-китобидан келиб чиқиб Ўзбекистондан жўнаб кетиладиган санадан 6 ой кейинги муддат учун Ўзбекистон миллий валютасида тўланади.
Пенсия тўланадиган олти ойлик давр Ўзбекистондан ташқарига доимий яшаш учун кетишдан аввал берилган аризада кўрсатилган санадан бошлаб ҳисоблаб чиқилади, бунда ариза берилган ойда ҳисобланган (тўланган) пенсия пули ҳисобга олинади.
Олти ой учун олдиндан пенсия тўлаш ариза, фуқаронинг шахсини тасдиқлайдиган Ўзбекистон Республикаси фуқароси паспорти, чет эллик учун яшаш ҳуқуқини берувчи гувоҳнома, фуқаролиги бўлмаган шахс гувоҳномаси асосида, мазкур ҳужжатларда «Доимий яшаш жойидан рўйхатдан чиқарилди» деган белги ҳамда ички ишлар органларининг миграция ва фуқароликни расмийлаштириш бўлимининг доимий яшаш учун кетиш тўғрисидаги стикери, кетиш варақчаси, шунингдек шахс бориш ниятида бўлган хорижий давлатнинг визаси (агар бу зарур бўлса) бўлганда — Ўзбекистон Республикаси фуқаросига, хорижий фуқарога ва фуқаролиги бўлмаган шахсга тўланади<
Пенсияни олти ой олдиндан тўлаш пенсияни етказиб бериш юкланган ташкилот орқали бир марталик қайднома асосида, шунингдек тижорат банкининг филиалида пенсионернинг номига очилган банк ҳисобрақамига нақдсиз пул ўтказиш йўли билан амалга оширилади. Мазкур пенсияни тўлаш пенсияни етказиб бериш юкланган ташкилотга молиялаштирилган пенсия маблағлари ҳисобидан тўланади.
Мазкур пенсия суммасини Ўзбекистон қонун ҳужжатларига мувофиқ пенсия тўланган даврда пенсиялар миқдорлари ўзгарганлиги муносабати билан қайта ҳисоб-китоб қилиш амалга оширилмайди.
Агар шахсга пенсия олти ой олдиндан тўлангандан кейин доимий яшаш учун Ўзбекистон ташқарига кетмаган бўлса, унга пенсия тўланган олти ойлик давр тамом бўлгандан кейин пенсияни тўлаш учун мурожаат қилинган тақдирда пенсия тўланиши мумкин.
Изоҳ (0)