Польша пойтахти Варшавада аҳоли 13 декабрь, якшанба куни ҳукуматга қарши оммавий намойишга чиқди, деб ёзади «ТАСС». Улар мамлакатдаги ҳукмрон «Қонун ва адолат» партияси (PiC) сиёсатига қарши чиқмоқда.
Одамлар Варшаванинг марказий кўчаларини тўсиб қўйди. Намойишда Польша Тадбиркорлар кенгаши вакиллари ҳам қатнашмоқда, улар ҳукуматнинг соҳадаги коронавирус тарқалишига қарши сиёсатидан норози, шу туфайли иқтисодиётнинг кўплаб тармоқлари жабр кўрди, деб ҳисобламоқда улар.
Бир неча минг киши намойишга Польша байроқлари ва «Етар!», «Эркинлик ва тенглик», «Менинг танловим — гуноҳ эмас», «Сизлар фирмаларни бузяпсиз», «Норозиликка ҳақлимиз», «Мен танлов тарафдориман» шиорлари ёзилган тахталар билан келди.
Акция аёллар норозилик ҳаракати томонидан ташкил қилинди, у 22 октябрда Конституциявий суд томонидан патология сабабли ҳомилани олдириш мамлакат бош қонунига зид эканлиги ҳақида қарор қабул қилинганидан кейин оммавий намойишлар ўтказишни бошлаган эди.
Ушбу суд қарори «Расмий ахборотнома»да эълон қилинганидан кейин кучга киради. Бу қачон юз бериши номаълум, чунки ҳукумат чоп этишни кейинга қолдиришга қарор қилди. Агар қарор расман эълон қилинса, ўша вақтдан бошлаб мамлакатда ҳомилани олдириш учун расман рухсат бериладиган иккита сабаб қолиши мумкин, булар — онанинг ҳаёти ва саломатлигига нисбатан хавф ҳамда зўрлаш оқибатидаги ҳомиладорлик.
Суд қароридан кейин юз минглаб одамлар иштирокидаги норозилик намойишлари икки ҳафта давомида деярли ҳар куни Польшанинг 400 дан ортиқ шаҳарларида бўлиб ўтди. Намойишлар ташкилотчилари ҳукуматнинг истеъфосини ва Ярослав Качиньскийнинг «Қонун ва адолат» ҳукмрон партияси кетишини талаб қилмоқда. Ҳукумат намойишлар иштирокчиларини коронавирус тарқалишига имконият яратмаслик учун ўз фаолиятини тўхтатишга чақирмоқда.
22 октябрда Польша Конституциявий суди мамлакатда ҳомила патологияси туфайли аборт қилишга рухсат берилганини асосий қонунга зид деб топганди. Конституциявий суднинг ушбу қарори аборт қилишни деярли бутунлай тақиқлайди. Оммавий норозилик намойишлари бошлангандан сўнг Польша президенти Анжей Дуда қонунга тузатишлар киритилишини айтди, унга кўра болада ўлимга олиб келадиган патологиялар бўлса, аборт қилишга рухсат этилади.
Изоҳ (0)