Polshada homilani oldirishga qo‘yilgan taqiq keyinga qoldirildi

Polsha hukumati tibbiy ko‘rsatmalarga ko‘ra homilani oldirishga joriy etilgan taqiqni keyinga qoldirishga qaror qildi. “Kommersant”ning xabar berishicha, bunga mamlakatda 22-oktabrdan beri davom etayotgan ko‘plab odamlarning noroziliklari sabab bo‘ldi.

22-oktabrda Polsha Konstitutsiyaviy sudi mamlakatda homila patologiyasi tufayli abort qilishga ruxsat berilgani asosiy qonunga zid deb topgandi. Konstitutsiyaviy sudning ushbu qarori abort qilishni deyarli butunlay taqiqlaydi. Ommaviy norozilik namoyishlari boshlangandan so‘ng, Polsha prezidenti Anjey Duda qonunga tuzatishlar kiritilishini aytdi, unga ko‘ra bolada o‘limga olib keladigan patologiyalar bo‘lsa, abort qilishga ruxsat etiladi.

2019-yilda Polshada mingga yaqin qonuniy abort o‘tkazilgan. Huquq himoyachilarining baholashicha, har yili 80 mingdan 120 minggacha polshalik ayol homilasini boshqa davlatda oldirib kelishga harakat qiladi.