Polshada jiddiy nuqsoni bo‘lsa ham homilani oldirish taqiqlandi. Bunga qarshi yuzlab aholi norozilik bildirib chiqish qildi
Polsha Konstitutsiyaviy sudi homilada jiddiy nuqson va bedavo dard aniqlansa, homilani oldirish imkoniyatini bekor qildi, deb xabar bermoqda Meduza. Mamlakatdagi qonuniy abortlarning 98 foizi shu sababli amalga oshirilardi.
Polskie Radio’da qayd etilishicha, Polsha Konstitutsiyaviy sudi bunday imkoniyatni bergan 1993-yilgi qonundagi moddani konstitutsiyaga zid deb topgan.
Associated Press’ning yozishicha, Konstitutsiyaviy sudning 11 nafar sudyasi bu qarorni qo‘llab-quvvatlagan, ikki nafari qarshi chiqqan. Sud Seym (Polsha bir palatali parlamenti)ning to‘rtta, shu jumladan, “Huquq va adolat” hukmron konservativ partiyasidan bo‘lgan 100 dan ortiq deputatning murojaatini qanoatlantirgan.
Sud o‘z qarorini e’lon qilganidan bir necha soat o‘tib, yuzlab odamlar koronavirusga qarshi cheklovlarni buzgan holda Konstitutsiyaviy sudga qarshi norozilik namoyishiga chiqqan, so‘ng “Huquq va adolat” partiyasi idorasiga borgan. Partiya ayollarni qo‘llab-quvvatlash uchun yangi qonun tayyorlanishini bildirgan.
Polshada homilani oldirish bo‘yicha Yevropadagi eng qat’iy qonunlar amal qiladi. BBC News’ning yozishicha, homilaning tuzalmas kasallik tufayli olinishi mamlakatda abort qilishning deyarli butunlay taqiqlanganini bildiradi.
2019-yilda Polshada mingga yaqin qonuniy abort o‘tkazilgan. Huquq himoyachilarining baholashicha, har yili polshalik ayollarning 80 mingdan 120 ming nafari homilasini boshqa davlatda oldirib kelishga harakat qiladi.
