Ўзбекистонда 2021 йилнинг 16 январидан барча онлайн шаклда ўқиётган талабалар учун ўқув жараёни анъанавий шаклда бошланиши ҳақидаги хабарлар тарқалди.
Олий ва ўрта махсус таълим вазирлиги матбуот хизмати бу хабарларни рад этди.
«Шуни расман маълум қиламизки, олий таълим муассасаларининг барча талабаларини тўлиқ анъанавий таълим шаклига ўтказиш режалаштирилмаган. Мазкур масалада янгилик бўлса, вазирлик расмий веб-сайти ва Telegram канали орқали маълум қилинади», — дейилади вазирлик раддиясида.
Эслатиб ўтамиз, Ўзбекистон олий таълим муассасаларида 2020/2021-ўқув йили 2 сентябрдан масофавий шаклда бошланганди. Сентябрь ойининг бошида Олий ва ўрта-махсус таълим вазирлиги матбуот котиби Фарҳод Бабашев Ўзбекистон ОТМларида анъанавий таълим шакли 2021 йилнинг январь—февраль ойларида иккинчи семестр бошланиш вақтида қайта тикланиши мумкинлигини айтганди.
Республика комиссиясининг 2020 йил 12 ноябрдаги йиғилиши қарорига мувофиқ, барча олий таълим муассасаларида 2020 йилнинг 16 ноябридан олий таълим муассасаси томонидан ишлаб чиқилган чора-тадбирлар ва режа-график асосида ўқув жараёнини анъанавий шаклда давом эттириш белгиланди.
Олий ва ўрта махсус таълим вазирлиги бошқарма бошлиғи Абдували Холиқов 14 ноябрь куни бўлиб ўтган матбуот анжуманида талабалар таълим муассасаларига бора олмаса, масофавий ўқишни давом эттиришлари мумкинлигини айтганди.
Изоҳ (0)