Одина Тўхтасинова «Севги» ва «Шукрона» сериаллари орқали томошабинлар эътиборини қозонди. Журналист Наргиза Муродова ёш актриса билан суҳбат уюштирди.

Фото: Одина Тўхтасинованинг шахсий архивидан

«Ҳамшираликни эплай олмадим»

Оиламизга санъат бегона, аммо бувим раҳматли болалигимдан актриса бўлишимни орзу қилган. Чунки мактаб чоғларида санъатга жуда қизиқардим. Аммо ота-онам санъаткор бўлишимни исташмади. Шу боис мактабни тамомлаб, ҳамширалик бўйича таҳсил олдим. Аммо мутахассислигим бўйича фаолият юритолмадим. Коллежни тамомлагач, бир муддат касалхонада ишлаганман. Оғир аҳволдаги беморларни кўриб, руҳан қийналдим. Шундан сўнг тиббиёт соҳасида ишлолмаслигимни англаб етдим.

Актриса режиссёр ва актёр Сарвар Исаев билан.

Фото: Одина Тўхтасинованинг шахсий архивидан

«Таржимонлик соҳасидан актрисаликка»

Жамиятда ўз ўрнимни топиш учун жиддий интилганман. Шу боис, икки йил давомида хориж тилини ўргатувчи ўқув марказга қатнадим. Корейс тилини мукаммал ўрганиб, таржимонлик фаолиятимни бошладим. Аммо болаликдаги санъатга бўлган иштиёқим сўнмади. Кастингларда иштирок этиб турдим. Илк ролимни Даврон Умаров режиссёрлигидаги «Жанговор қайнона» фильмида ижро этганман, ундан кейин «Қадам» сериалида суратга тушдим. Гарчи роллар у қадар катта бўлмаса-да, ўзим учун жуда қадрли.

Фото: Одина Тўхтасинованинг шахсий архивидан

«Севги» сериали ва режиссёр билан муносабати

Режиссёр Дурдона Тўлагонова билан танишишимга Зарнигор Ғаниева сабабчи бўлган. Ўша пайтда Дурдона опа «Журналист» сериалини суратга олаётганди. Зарнигор опа «Кичик эпизод роль бор, ўйнаб бероласизми?» деган. Табиийки, таклифни жон деб қабул қилганман ва кичик ролим «Севги» сериалига таклиф этилишимга сабаб бўлган. Ундан кейин «Шукрона» сериалида асосий ролни ишониб топширишди. Ростини айтсам, илгари роль ўйнашни чиройли кийиниб, кадр олдида туриш деб тушунган эканман. Марям роли орқали унинг нақадар қийинлигини англадим.

Актриса ўғиллари билан.

Фото: Одина Тўхтасинованинг шахсий архивидан

Оиласи ва фарзандлари ҳақида

«Турмушга чиққанмисиз? Биз сизни оила қуриш остонасидаги қиз деб ўйлагандик?» деган гапларни кўп эшитаман. Эрта оила қурганим боис ўғилларим анча улғайиб қолишган. Катта ўғлим Амирхон 13 ёшда, Темурхон эса 12 ёш. Турмуш ўртоғим оилавий расмларни ижтимоий тармоқларга жойлашимни унчалик ёқтирмайди. Улар санъатни тушунгани билан жаҳллари чиқадиган вазиятлар ҳам бўлиб туради. Чунки охирги пайтларда «Шукрона» сериалининг сёмка жараёнлари 13-14 соат давом этаяпти. Аммо навбати билан ўғилларим мен билан бирга сёмка жараёнларида иштирок этишади.

Фото: Одина Тўхтасинованинг шахсий архивидан

«Асосий касбимни давом эттираман»

Албатта, асосий касбимни давом эттираман. Аммо санъатга ҳам шунчаки хобби деб қараш ниятим йўқ. Агар ижроларим халққа манзур бўлаётган бўлса, давом эттираман.

Маълумот учун, Одина Тўхтасинова 1988 йил 26 февраль санасида Фарғона вилоятининг Бешариқ туманида таваллуд топган. Шу кунгача «Жанговор қайнона», «Қадам», «Севги» ва «Шукрона» фильм ва сериалларида суратга тушган. Аммо унга кўпроқ «Шукрона» сериалидаги Марям роли омад олиб келди.

Фото: Одина Тўхтасинованинг шахсий архивидан

Фото: Одина Тўхтасинованинг шахсий архивидан