Дунёда ёлғон хабарлар йўқолади, шаҳарлар қаровсиз қолади, қайтага ишлаш шарт бўлмайди. Saxo Bank 2021 йил учун «ҳайратга солувчи башоратлар»ни эълон қилди
Даниянинг Saxo Bank инвестиция банки 2021 йил учун «ҳайратга солувчи прогнозлар»ни эълон қилди. 18 йилдан буён эълон қилиб келинадиган башоратларни банкнинг ўзидагилар «молиявий бозорларга катта таъсир ўтказиши мумкин бўлган эҳтимолдан узоқ ҳодисалар» деб атайди. Банк анъанавий тарзда 10 та прогнозни эълон қилади, Meduza улардан эътиборга энг лойиқ бўлганларини танлаб олди.
2021 йилда ҳатто яхши обрўга эга янгилик етказувчиларга нисбатан ишончнинг йўқолиши даражаси ҳам кескинлашади, бунинг натижасида йирик медиакомпаниялар ва ижтимоий тармоқлар ёлғон хабарларга қарши жиддий чоралар кўришга мажбур бўлади. Янгиликлар контенти умумий блокчейн-тармоққа бирлаштирилади, у янгиликларнинг ишончлилигини асл манбанинг ўзига қадар текшириш имконини беради. Кўчириб ёзишда мазмунга киритилган ҳар қандай ўзгаришларни ҳам текшириш мумкин бўлади. Twitter ва Facebook ўзларини текширувчи органлар томонидан бўладиган танқид ва қўшимча назоратдан ҳимоя қилиш учун янги технологияга анчагина маблағ киритади. Шу сабабли ҚАнон каби фитна назариялари ёки коронавирус пандемияси ҳақидаги дезинформация бу платформалардан тезликда йўқолади.
Amazon Кипрга кўчиб ўтади
2021 йил йирик технологик компаниялар ҳамда корпорациялар тобора кўпроқ қудратга эга бўлиб, ўта кам солиқ тўлаяпти, деган фикрда бўлган ҳукуматлар ўртасидаги ишончсизликни чуқурлаштиради. Америкалик мансабдорлар томонидан зиддият ўсиб бориши туфайли Amazon бош қароргоҳини Кипрга кўчиради. Ялпи ички маҳсулоти Amazon’нинг АҚШдан ташқаридаги даромадларидан тўрт марта камроқ бўлган оролнинг ҳукумати мамлакат ташқи қарзини камайтиришга ёрдам берадиган катта-катта солиқ тушумларидан мамнун бўлади. Ҳатто Кипр ҳукумати Amazon маслаҳатчилари раҳбарлигида солиқ қонунчилигини қайта ёзиб, даромад солиғи ставкаларини пасайтириши мумкин, бу эса аҳоли томонидан ижобий қарши олинади. Аммо Европа регуляторлари Amazon’ни ўз хатти-ҳаракатларини қайта кўриб чиқишга, Кипрни эса солиқ қонунчилигини Евроиттифоқ меъёрларига мувофиқлаштиришга мажбур қилади. Айни вақтда АҚШ ва бошқа мамлакатлар ҳам онлайн-монополияга ҳужум бошлайди.
Шартсиз таянч даромад мегаполисларнинг қаровсиз қолишига олиб келади
Пандемиянинг иқтисодиётга таъсири тенгсизликнинг кучайишига ва инқироз туфайли иш ўринларининг оммавий йўқотилишига олиб келди. Жамиятнинг турли қатламлари орасидаги алоқанинг бутунлай йўқ бўлишига ҳамма жойда умумий таянч даромадни жорий қилиш орқали йўл қўймаслик мумкин, яъни пандемия пайтида ҳукуматлар томонидан фуқароларга вақтинчалик кўрсатиладиган молиявий кўмак янги доимий воқеликка айланади. Бу ҳамма жойда уйдан ишлашнинг кенг тарқалиши билан биргаликда ишчи кучининг географик жиҳатдан қайта тақсимланишига олиб келади: одамлар энди пул орқасидан катта шаҳарларга кўчиб ўтиши керак бўлмайди. Бунинг натижасида офис бинолари нархи кескин тушиб кета бошлайди — айни вақтда аввал офис ишчиларига хизмат кўрсатган дўкон ва ресторанларга эҳтиёж ҳам пасаяди. Профессионал ишчилар шаҳарларни тарк эта бошлайди, чунки ишга жойлашиш имконияти камаяди. Шу билан бирга, уй-жойларнинг баланд нархлари ва жиноятлар сабабли мегаполисларнинг жозибадорлиги ҳам камаяди.
COVID-19’га нисбатан муваффақиятли эмлаш кўплаб компанияларни йўқ қилиб юборади
Корпоратив қимматли қоғозларнинг даромадлилиги сўнгги йилларда тарихий минимумда турибди — бунга АҚШ ва Евроиттифоқ томонидан олиб борилаётган паст фоиз ставкалари сиёсати сабаб бўлди. Шу туфайли инвесторлар сердаромадроқ ва албатта риски кўпроқ активларга ўтишни бошлади. Коронавирусга нисбатан самарали вакцинани кутиш рискка мойилликни қўллаб-қувватламоқда — иқтисодиёт жуда тез қайта тикланиши ва ўсиши тахмин қилинмоқда. Аммо бу жуда тезлик билан бозорнинг ортиқча қизиб кетишига ва инфляция ўсишига олиб келади, бунинг натижасида АҚШ Федерал захира тизими молиялаштириш шартларини кескин кучайтиради. Бу кўп сонли корпоратив дефолтларга сабаб бўлади. Биринчи бўлиб чакана офлайн-савдо секторидаги энг кўп қарзга ботган компаниялар жабр кўради.
Термоядро энергетикасидаги инқилоб бутун дунёда яшаш даражасининг кескин ўзгаришига олиб келади
2021 йилда сунъий ақлнинг такомиллаштирилган алгоритмлари плазма физикаси соҳасидаги энг мураккаб масалаларни еча олиш даражасига етади, бу ядровий синтездан тижорат мақсадида фойдаланишни бошлаш имконини беради. Сунъий ақл шарофати билан Массачусец технология институти тадқиқотчилари энергетика соҳасида сўнгги ўн йилликдаги энг катта янгиликни амалга оширади. Оммавий инвестициялар атиги бир неча йил ичида термоядро синтези конструкциясини амалга ошириш имкониятини яратади. Янги энергия манбаи сув ва озиқ-овқат етишмовчилиги муаммосини ҳал қилади, транспорт ва автоматлаштириш технологияларини арзонлаштиради, бу эса шунга олиб келадики, кейинги ёш авлодда ишлашга бўлган катта эҳтиёж йўқолади. Термоядро энергиясидан фойдаланиш ҳар бир мамлакатга озиқ-овқат ва энергетика жиҳатидан мустақилликни таъминлаш имконини беради, бу инсоният тарихида яшаш даражасининг энг катта кўламда ошишига туртки бўлади.
Изоҳ (0)