Дастлабки маълумотларга кўра, АҚШ президент сайловида ғолиб чиққан Жо Байден мудофаа вазири лавозимига истеъфодаги генерал Ллойд Остинни тайинламоқчи, деб ёзади «Коммерсантъ» Politico ва The Associated Press’га таяниб. У ушбу лавозимдаги биринчи афроамерикаликка айланиши мумкин.
Остин 67 ёшда. У 2013—2016 йилларда АҚШ Қуролли кучлари Марказий қўмондонлигини бошқарган. Байденнинг ўтиш жамоаси маълум қилишича, демократ мудофаа вазири ҳамда иқтисодий блок аъзолари исмларини ҳафта охиригача эълон қилади.
Аввалроқ Оқ уй миллий иқтисодий кенгаши раҳбари Лоуренс Кадлоу АҚШнинг амалдаги президенти Дональд Трамп президент сайловларида ғолиб чиққан демократ Жо Байденга ҳокимиятни тинч йўл билан топширишини маълум қилган эди.
Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.
Кейинроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.
Изоҳ (0)