Самарқанд шаҳри марказидаги Afrosiyob Palace меҳмонхона мажмуасининг аукцион савдолари якунланди, деб хабар беради Давлат активларини бошқариш агентлиги матбуот хизмати.
Маълум қилинишича, аукционда 3 та иштирокчи қатнашган. Бошланғич нархи 27,4 миллиард сўм бўлган давлат активи 29 қадам билан 43,3 миллиард сўмга сотилган.
Маълумот учун, ушбу давлат активини сотиб олган ғолиб 2022 йил 1 апрелга қадар 100 та янги иш ўрни яратиб, халқаро стандартларга мос келадиган 4 юлдузли меҳмонхона мажмуасини тўлиқ фойдаланишга топшириши керак.
Эслатиб ўтамиз, 2018 йилнинг кузида Самарқанд вилояти ҳокимлиги ва инвестициялар давлат қўмитаси Сингапурнинг Exim Investments Ple компанияси Afrosiyob Palace меҳмонхонасини реконструкция қилиш бўйича келишувга эришган. Лойиҳа бизнес-режаси ҳам тайёр бўлган. Инвестор барча кредит қарздорлигини қоплаши, шунингдек, бу ерда замонавий меҳмонхона комплексини барпо этиши учун икки йил мобайнида 12 миллион доллар миқдорида инвестиция киритиш мажбуриятини олиши лозим бўлган.
Агентлик матбуот хизматининг маълум қилишича, инвестор шартномада белгиланган мажбуриятларни ўз вақтида бажармаган, шу сабабли олди-сотди шартномаси бекор қилинган. 2020 йилнинг ноябрида меҳмонхона қайта сотувга қўйилган.
Изоҳ (0)