Bloomberg агентлиги 2020 йилда ўз соҳаларида энг катта ютуқларга эришган 50 киши рўйхатини тузди. Рўйхат бешта асосий йўналишга ажратилган, булар — бизнес, молия, кўнгилочар, сиёсат ҳамда фан ва технологиялар. Бу ҳақда Spot хабар бермоқда.

Фото: «Zn.ua»

Энг атоқли бизнесменлар қаторига Netflix’нинг ўз тарихидаги энг тез ўсишини таъминлаган компания ҳамтаъсисчиси Рид Хастингс, 1700 дан ортиқ тиббиёт ходими учун 10 миллион доллардан зиёд маблағ ажратган Econet Group асосчиси Страйв Масайиа, шунингдек, тўққизта йирик ритейлерни ўз пештахталарининг 15 фоизини қора танли тадбиркорлар томонидан ишлаб чиқарилган маҳсулотлар учун ажратишга кўндирган Fifteen Percent Pledge лойиҳаси асосчиси Аврора Жеймс кирди.

Молиячилар орасида Bloomberg муҳтож мамлакатларга кредит ажратишни 50 фоизга кўпайтирган Халқаро валюта жамғармаси бошқарувчи директори Кристалина Георгиевани, рўйхатдан ўтган фойдаланувчилар сонининг кескин ўсишини таъминлаган Robinhood ҳамасосчилари Байжу Бхатт ва Владимир Теневни ҳамда тез орада Citigroup раҳбари лавозимини эгаллаб, Америка йирик банкининг биринчи аёл раҳбарига айланадиган Жейн Фрэйзерни қайд этди.

Кўнгилочар йўналишида энг катта муваффақиятга, агентлик фикрича, қўшиқчи Билли Айлиш, комедияли актриса Селеста Барбер, Universal Filmed Entertainment раҳбари Донна Ленгли ва фаол Колин Каперник эришган.

Фан ва технологиялар соҳасида эса SpaceX президенти Гвинн Шотвелл, Contemporary Amperex Technology раҳбари Зенг Юкун, Оқ уй бош иммунологи Энтони Фаучи ва компаниядаги «заҳарли» шароитдан норозилик белгиси сифатида истеъфо берган Amazon собиқ вице-президенти Тим Брей энг кўзга кўринарли натижаларга эришган.

Ўз навбатида, сиёсат йўналишида агентлик Беларусь мухолифати етакчиси Светлана Тихановскаянинг, Уругвай президенти Луис Лакалье Поунинг ҳамда Black Lives Matter ҳаракати асосчилари Алисия Гарза, Патрис Каллорс ва Опал Тометининг муваффақиятларини қайд этди.

Бундан ташқари, Bloomberg 2020 йилдаги энг муҳим шахслар рўйхатига киритилиши «ҳеч кимни ажаблантирмайдиган» одамларни ҳам айтиб ўтди. Улар орасида Россия президенти Владимир Путин, АҚШ президенти Дональд Трамп ва АҚШнинг сайланган президенти Жо Байден, Шимолий Корея етакчиси Ким Чен Ин, Германия канцлери Ангела Меркель, Франция президенти Эммануэль Макрон, ХХР раҳбари Си Цзиньпин ва Рим папаси Франциск ҳам бор. Шунингдек, Amazon асосчиси Жефф Безос, Apple раҳбари Тим Кук, SpaceX ва Tesla асосчиси Илон Маск ва Facebook раҳбари Марк Цукерберг ҳам шу йўналишга киритилди.

Аввалроқ Time журнали ўз тарихида биринчи марта «Йил боласи»ни танлаб олгани хабар берилди. Шунингдек, 2020 йилни тарихдаги энг ёмон йил деб эътироф этди ва ўз муқовасига иккита қизил чизиқ билан чизиб ташланган 2020 рақамини жойлаштирди.

Financial Times газетаси ва МcКинсей консалтинг компанияси эса Сара Фраернинг «Фильтрсиз: Instagram’нинг инсайдерлик тарихи» китобини 2020 йилнинг энг яхши бизнес-китоби деб топди.