Парранда гриппи сабаб Англияда 40 мингга яқин курка йўқ қилинди, Японияда эса 140 мингга яқин товуқ ўлдирилади

Англия шарқидаги Норфолк графлигида жойлашган курка етиштириш фермасида парранда гриппи авж олди, 30 мингдан ортиқ парранда ўлдирилди. Бу ҳақда Sun газетаси атроф-муҳитни муҳофаза қилиш вазирлигига таяниб хабар бермоқда.

Ўтган ҳафта Шимолий Йоркширдаги фермада ҳам парранда гриппи аниқланган, шу сабабли 10,5 мингта курка йўқ қилинган эди.

«Норфолкдаги бу ҳудудда ветеринар текширув давом этмоқда, инфекциянинг эҳтимолий манбасини ва касаллик қанча вақтдан буён сақланиб келаётганлигини аниқламоқчимиз. Англиядаги бир нечта паррандачилик фермаларида тасдиқланган парранда гриппи штамми айни пайтда Европада ёввойи ва тутқунликда сақланаётган қушлар орасида айланаётган вирус билан яқин боғлиқликка эга бўлиши мумкин», — деди вазирлик вакили.

Газета қайд этишича, парранда гриппининг авж олиши ва куркаларнинг ёппасига йўқ қилиниши Рождество арафасида улар озиқ-овқат дўконларида танқис бўлиб қолишига олиб келиши мумкин. Чунки курка британияликларнинг Рождество дастурхонидаги энг оммабоп таомлардан биридир.

Шунингдек, Япониянинг Хиросима префектурасида ҳам парранда гриппи авж олиши оқибатида камида 134 мингта курка йўқ қилинади.

Касалланиш ўчоғи Михара шаҳридаги фермалардан бирида қайд этилди. У ерда ўтган дам олиш кунлари 11 та товуқ нобуд бўлган, мутахассислар бу парранда гриппи туфайли юз берганини тасдиқлаган. Шу муносабат билан маҳаллий ҳукумат товуқларни йўқ қилиш ва ҳудудда санитар назоратни таъминлашни буюрди.

Бу Хиросимада 2004 йилдан буён парранда гриппи аниқланиши билан боғлиқ биринчи ҳолатдир.

Аввалроқ инфекция ўчоқлари Япониянинг Кагава, Миядзаки, Нара, Фукуока, Хёго префектураларида ҳам қайд этилган эди. Шу сабабли у ҳудудларда жами 2 миллиондан ортиқ товуқ йўқ қилинган.

Эслатиб ўтамиз, Қозоғистон шимолида юқори патогенли парранда гриппи тарқалгани тўғрисида хабар берилганди. Кейинроқ мамлакатнинг тўртта ҳудудида парранда гриппи тарқалаётгани расман тасдиқланган.

Аввалроқ Хитойда коронавирус эпимаркази яқинидаги ҳудудда парранда гриппи тарқалгани, Саудия Арабистони ва Вьетнамда юқори патогенли парранда гриппи аниқлангани тўғрисида хабар берилганди.