Time jurnali birinchi marta “Yil bolasi”ni tanlab oldi. Bunga Greta Tunberg turtki bo‘ldi

Time jurnali o‘z tarixida birinchi marta “Yil bolasi”ni tanlab oldi. Bu yo‘nalish ekofaol Greta Tunberg sharofati bilan yuzaga kelgan: u 2019-yilda jurnal tomonidan “Yil odami” deya e’tirof etilgan birinchi o‘smirga aylangan edi. Time uning tengdoshlari va undan kichik bo‘lganlar uchun ataylab yangi yo‘nalishni joriy etishga qaror qildi. Bu haqda TJournal xabar bermoqda.

Time talqini bo‘yicha ilk “Yil bolasi” Gitanjali Rao ismli 15 yoshli koloradolik qiz bo‘ldi. Qizcha kiberbulling (internet orqali kamsitishlar)ga qarshi kurash uchun sun’iy aqlni tadqiq qilmoqda hamda ichimlik suvining ifloslanganligini aniqlovchi sensorlarni yaratish ustida ishlamoqda. Xususan, u Kindly servisini ishlab chiqqan bo‘lib, u internetda haqoratlarni tanib oladi va bunday xabarni jo‘natish-jo‘natmaslik haqida o‘ylab ko‘rish imkonini beradi.

“Dunyo uni shakllantiruvchi odamlarga tegishli… Yoshlar bugungi kunda katta ta’sirga ega va ular bu ta’sirdan o‘z tasavvurlariga mos keladigan dunyoni shakllantirishda foydalanmoqda”, — deb yozadi Time.

G‘olibni aniqlash uchun Time va Nickelodeon kanali jurnalistlari sakkizdan 16 yoshgacha bo‘lgan 5 mingdan ortiq nomzodlarning ma’lumotlarini o‘rganib chiqdi va besh nafar da’vogarni saralab oldi. Ularning barchasiga Nickelodeon’ga egalik qiluvchi Viacom kompaniyasidan pul mukofoti taqdim etiladi.

2019-yilda Raoni Forbes jurnali o‘zining “Ilm-fan” yo‘nalishidagi “30 gacha bo‘lgan 30 nafar” ro‘yxatiga kiritgan. 2020-yilda esa Time uni “dunyoni o‘zgartirayotgan yosh ixtirochi”lardan biri deb e’tirof etgan. 2017-yilda qiz AQShning eng yaxshi yosh olimi e’tirofiga sazovor bo‘lgan edi.

“Bularning barchasi tez orada bizning avlod qo‘liga o‘tadi… Mening maqsadim nafaqat dunyo muammolarini hal qilish uchun o‘z qurilmalarimni yaratish, balki boshqalarni ham xuddi shu ishni qilishga ilhomlantirishdan iborat. Chunki o‘z tajribamdan kelib chiqib, birorta ham o‘zingga o‘xshagan odamni ko‘rmaslik qanchalik qiyin ekanligini bilaman. Aytmoqchimanki, agar men nimadir qila olsam, demak siz ham shuni qila olasiz, har qanday odam qila oladi”, — dedi Rao Time’ga bergan intervyusida.

Meet TIME's first-ever Kid of the Year https://t.co/8ExwjanZfE pic.twitter.com/UkPscbp63H

— TIME (@TIME) December 3, 2020