Дэйна Уайт кубалик афсона Ёэл Ромеронинг UFC’дан кетишига нима сабаб бўлганини маълум қилди

UFC президенти Дэйна Уайт кубалик яккакурашчи Ёэл Ромеро (13-5) нима сабабдан промоушендан кетганини маълум қилди.

«Биз йил охиригача катта тозалашни амалга оширмоқчимиз. Ёэл бир нечта жангни бой берди, у 43 ёшда, жангчилар рўйхати эса жуда узун. Шундай экан кўплаб четлатишлар бўлади, кейинги ҳафталар ичида бизни тарк этган кўплаб номларни эшитасиз.

Ёэл билан музокараларда ҳеч қандай ғайритабиийлик бўлмади. У бир нечта жангни бой берди ва 43 ёшда. Бу қабул қилишимиз керак бўлган қийин қарор эди», — дейди Уайт.

Аввалроқ Ромеро ва UFC ўртасидаги шартнома бекор қилингани маълум бўлди.

43 ёшли кубалик яккакурашчи UFC’да 14 та жанг ўтказиб, уларнинг тўрттасида мағлуб бўлган. Хусусан, Ёэл сўнгги учта жангини бой берганди.

Ёэл Ромеро иштирокидаги жанглар видеосини бу ерда кўриш мумкин — видео

У сўнгги бор UFC 248 мусобақасида Исраэл Адесаняга қарши чемпионлик жангида иштирок этган ва унда мағлуб бўлганди.