Тошкент кўчаларида 1 декабрдан бошлаб 51-йўналишда (Юнусобод 6-мавзе—Бешёғоч майдони) 12 метрлик «Zhongtong» электр автобуси синов тариқасида ҳаракатлана бошлади.

Фото: Telegram / «Ко дну»

Маълум қилинишича, бу пойтахтда синовдан ўтказилаётган бешинчи электр автобус. Бундан аввал СамAuto компанияси 19 ноябрь куни «Тошшаҳартрансхизмат»га 51-йўналиш бўйича ҳаракатланадиган синов электробусини тақдим этганди.

Қайд этилишича, атроф-муҳитни муҳофаза қилиш бўйича 2030 йилгача мўлжалланган концепциясига мувофиқ, Ўзбекистон жамоат транспортининг камида 50 фоизи зарарли моддаларни ҳавога чиқаришни камайтириш учун муқобил ёқилғи турларига ўтиши керак.

Эслатиб ўтамиз, Тошкент шаҳар ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 2019 йилнинг 13 сентябридан ҳаракатланишни бошлаганди. 2020 йилнинг март ойидан бошлаб эса Тошкентнинг 52-автобус йўналиши (Бешёғоч—Юнусобод) бўйлаб Хитойнинг Yutong электробуси синов тариқасида қатнай бошлаганди.

Аввалроқ Тошкентга уч йил ичида 300 та янги электробус олиб келиниши мумкинлиги ҳақида хабар берилганди.