Шавкат Мирзиёев 4 декабрь, жума куни Тошкент металлургия заводининг очилишига бағишланган тантанали тадбирлар доирасида Россия саноат ва савдо вазири Денис Мантуров бошчилигидаги делегацияни қабул қилди.
Президент матбуот хизматининг хабар беришича, давлат раҳбари пойтахт ҳудудида амалга оширилган металлургия маҳсулотлари ишлаб чиқариш бўйича йирик ва замонавий корхонани ташкил этиш лойиҳаси Ўзбекистон ва Россия компания ва банклари ўртасидаги самарали ҳамкорликнинг намунаси эканини катта мамнуният билан қайд этди.
Ушбу завод 4 декабрь куни очилиши ҳақида Россиянинг «Метпром» муҳандислик-қурилиш гуруҳи президенти Андрей Дейнеко маълум қилганди. Мазкур заводни барпо этиш 2017 йил февралда бошланган бўлиб, қурилиш ишларига 420 миллион доллар сарфланган.
Қайд этилишича, заводнинг вужудга келиши кейинги йилларда икки томонлама савдо-иқтисодий ҳамкорликда жиддий сифат ўзгаришлари кузатилаётганидан ҳам далолат беради.
Денис Мантуров самимий қабул учун Ўзбекистон раҳбарига миннатдорлик билдирди ҳамда Владимир Путиннинг саломи ва энг эзгу тилакларини етказди.
Учрашувда устувор қўшма дастур ва лойиҳаларнинг бориши кўриб чиқилди, амалий ҳамкорликни кенгайтириш борасидаги режалар муҳокама қилинди. Машинасозлик, агросаноат, фармацевтика, енгил ва озиқ-овқат саноати, кўплаб бошқа тармоқларда юқори технологик ишлаб чиқариш қувватларини ташкил этишда икки мамлакатнинг етакчи корхоналари ўртасидаги кооперация лойиҳаларини ишлаб чиқиш ва илгари суриш масалаларига алоҳида эътибор қаратилди.
Эслатиб ўтамиз, Шавкат Мирзиёев 2 декабрь куни Ўзбекистонда амалий ташриф билан бўлиб турган Россия президенти администрацияси раҳбарининг ўринбосари Дмитрий Козак бошчилигидаги делегацияни қабул қилганди.
30 ноябрь куни эса Президент Владимир Путин билан телефон орқали мулоқот қилиб, 2020 йил декабрида видеоанжуман шаклида ўтказилиши режалаштирилган Ўзбекистон раислигидаги МДҲ саммитига тайёргарлик кўриш масаласини муҳокама қилган эди.
Изоҳ (0)