Самарқанд вилояти ҳокимлиги магистрлар учун 1 млн сўмлик стипендия эълон қилди

Самарқанд вилояти ҳокимлиги магистратура босқичида таҳсил олаётган талабалар учун стипендия жорий қилди. Стипендия дастурида Самарқанд вилоятида жойлашган олий таълим муассасаларида ўқиётган Ўзбекистоннинг барча фуқаролари иштирок эта олади.

Келиб тушган аризалар ичидан 10 нафар ғолиб саралаб олинади ва уларга 6 ой мобайнида ҳар ой 1 миллион сўмдан стипендия берилади.

Стипендия дастурида иштирок этиш учун давлат гранти ёки тўлов-контракт асосида ўқишнинг аҳамияти йўқ, бунга чеклов қўйилмаган. Шунингдек, барча мутахассислик магистрлари қатнашиши мумкин.

Ғолибларни саралашда номзоднинг аъло ўқиши, хорижий тилларни билиши, ижтимоий ҳаётда фаоллиги ва бошқа жиҳатлар инобатга олинади.

Аризалар 2020 йилнинг 31 декабрига қадар «www.metsenat.uz» сайти орқали қабул қилинади.

Эслатиб ўтамиз, бугунги кунга қадар «Metsenat.uz» лойиҳасида яна учта таълим гранти эълон қилинган эди. Булар:

• Ёшлар ишлари агентлиги, Ёшлар иттифоқи ва «Меҳрли қўллар» хайрия фонди томонидан барча талабалар учун жами 400 миллион сўмлик грант (ариза топширишнинг охирги муддати 10 декабрь);
• «Xushnudbek.uz» Telegram канали томонидан Тошкент давлат юридик университети талабалари учун жами 30 миллион сўмлик грант (ариза топширишнинг охирги муддати 14 декабрь);
• «Нажот таълим» маркази томонидан тиббиёт соҳасида ўқиётган хотин-қизлар учун жами 15 миллион сўмлик грант (ариза топширишнинг охирги муддати 2021 йил 10 январь).

Эслатиб ўтамиз, Ўзбекистонда илк маротаба талабалар учун таълим грантлари ҳамда стипендиялар эълон қилишга мўлжалланган www.metsenat.uz лойиҳаси 23 ноябрь куни ишга тушди.

Лойиҳа бир гуруҳ жамоатчилик фаолларининг ташаббуси билан ташкил қилинган. Лойиҳадан мақсад — Ўзбекистондаги меценатларни жалб қилган ҳолда эҳтиёжманд ва иқтидорли талабаларнинг тўлов-контрактини тўлашга ёрдам бериш, шунингдек, стипендиялар эълон қилишдан иборат.

Лойиҳа муаллифи Хушнудбек Худайбердиевнинг маълум қилишича, «Metsenat.uz» ижтимоий лойиҳа бўлиб, ундан ҳеч қандай тижорий мақсад кўзланмаган.

Сайтнинг ишлаш принципи оддий. Сайтда талабалар рўйхатдан ўтиб, ўзлари ҳақидаги маълумотларни киритади ва меценатлар томонидан эълон қилинган грант ёки стипендияларга онлайн ариза топширади.