Коронавирус тест таҳлили: Нотўғри натижа қайд қилинишининг сабаби нимада?

Бугунги кунда коронавирусни аниқлаш учун ПСР текширувидан кенг фойдаланилмоқда. Полимераза занжир реакцияси асосида текшириладиган мазкур тестда бурун ва оғиздан олинган намунада коронавирус бор ёки йўқлиги аниқланади. Лекин қандайдир сабаб билан вирус етарлича фаол кўпаймаган бўлса (айниқса зарарлангандан кейинги биринчи кун) тест таҳлили нотўғри натижани кўрсатиши мумкин. Қолаверса, беморнинг бепарволиги ёки намуна олиш жараёнининг етарлича пухта ташкил этилмагани ҳам нотўғри натижага сабаб бўлиши мумкин.

Бугунги кунда барча тестларнинг деярли 30 фоизи нотўғри натижа кўрсатмоқда, афсуски бу кичик кўрсаткич эмас. ПСР таҳлилида нотўғри натижа қайд қилинмаслиги имкониятини кўпайтириш учун қуйидагиларга амал қилиш тавсия қилинади.

Тест топширишнинг тўғри усули

Беморнинг бурун ёки оғзидан «мазок» олинади. Натижа максимал даражада аниқ бўлиши учун эса тест топширишдан 3 соат аввал чекмаслик, ичмаслик (ҳатто сув), тиш ва бурунни ювмаслик керак. Бу хатти-ҳаракатларнинг барчаси вирус қўзғатувчилар зарраларини «ювилиб» кетишига сабаб бўлиши ҳамда тестда вирус аниқланмаслиги мумкин.

Яна нималар тест натижасига таъсир қилиши мумкин?

Тест, шунингдек, касалликнинг бошланишида ёки касаллик бошланганидан узоқ вақт ўтиб топширилганда ҳам нотўғри натижа қайд қилиниши мумкин. Гап шундаки, касаллик эндигина бошланган беморда вируслар миқдори кам бўлиши ва бу тестда аниқланмаслиги мумкин. Узоқ вақтда эса вирус пастки нафас йўлларига ўтиши ва томоқ қисмида қолмаслиги ёки тест аниқлай олмайдиган даражада кам бўлиши мумкин.

Бундан ташқари, лаборатория ходимларининг бепарволиги ҳам натижага таъсир қилиши мумкин. Аниқ натижа учун эса ана шу вирус РНК бутун бўлиши керак.