Трамп 2024 йилги президент сайловларида қатнашиши мумкинлигига ишора қилди

АҚШнинг амалдаги президенти Дональд Трамп 2024 йилда давлат раҳбари лавозимига ўз номзодини қўйиши мумкинлигини билдирди. Бу ҳақда у Республикачилар партиясининг миллий қўмитаси аъзолари қаршисида сўзлаган нутқида айтиб ўтди, деб ёзади «РБК».

«Ўтган тўрт йил ажойиб эди. Биз яна тўрт йилни қўлга киритишга ҳаракат қиляпмиз. Агар бу амалга ошмаса, унда сиз билан яна тўрт йилдан кейин кўришамиз», — деди Трамп.

АҚШ президенти Дональд Трамп 2024 йилги президент сайловларида ўз номзодини илгари суриш имкониятини кўриб чиқаётганлиги ва 20 январь — янги президентнинг инаугурацияси куни шу билан боғлиқ тадбир ўтказиши мумкинлиги ҳақида ОАВлар аввалроқ хабар берган эди. Ўз навбатида The Washington Post газетаси Трамп йил охиригача келаси президент пойгасида қатнашиш ниятидалигини эълон қилиши мумкинлиги ҳақида ёзганди. Бу ҳақда, нашр маълумотлари бўйича, президент ўзининг ишончли шахсларига маълум қилган.

АҚШда президент сайловлари 3 ноябрь куни бўлиб ўтди. Дастлабки маълумотларга кўра, Жо Байден ғолиб бўлган. Унинг ғалабасини 14 декабрь куни сайловчилар ҳайъати узил-кесил тасдиқлаши керак.

Дональд Трамп ўз мағлубиятини тан олишдан бош тортди. Унинг ҳуқуқшунослари қатор штатларда сайловлар натижаларини қайта кўриб чиқиш ҳақида даъволар берди, аммо уларнинг Байденнинг фойдасига катта кўламда фирибгарликлар амалга оширилгани ҳақидаги гаплари ўз тасдиғини топмади.

Кейинроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.

Дональд Трамп рақиби, Демократлар партиясидан номзод Жо Байден сайловчилар (сайлов ҳайъати аъзолари)нинг кўпчилик овозини қўлга киритса, Оқ уйни тарк этишини маълум қилди. Айни вақтда Трамп, унинг фикрича, сайловлар қалбакилаштирилганини яна бир марта таъкидлади ва сайлов ҳайъати аъзоларининг Байденга овоз бериши катта хато бўлишини айтди.