Тошкентда ЙПХ ходимлари томонидан хизмат машинасида таъқиб қилинган автомобиллар бўйича маълумот берилди

Ижтимоий тармоқларда 2020 йилнинг 23 ноябрь куни «Бунақаси фақат киноларда бўларди» сарлавҳаси остидаги видеолавҳа тарқалди. Видеода ЙПХ машинаси орқа томонга ҳаракатланаётган Lacetti автомобилини таъқиб қилаётганини кўриш мумкин. Ички ишлар вазирлиги Йўл ҳаракати хавфсизлиги бош бошқармаси мазкур видеодаги ҳолат бўйича маълумот берди.

Маълум қилинишича, 2020 йилнинг 21 ноябрь куни соат 21:50 да Тошкент шаҳар ИИББ ЙҲХБ ЙПХ инспектори Н.Дусебаев Қорақамиш-1 ва Қорақамиш-2 кўчалари кесишган чорраҳада хизмат олиб бораётган вақтида Lacetti русумли, давлат рақам белгиси 01 R 515 RА бўлган автомобиль ҳайдовчиси светофорнинг тақиқловчи қизил чироғида ҳаракатланган. Шу боис инспектор жезл ва ҳуштак ёрдамида тўхташ ишорасини берган.

«Ҳайдовчи ЙПХ ходимининг қонуний талабини бажармасдан ҳаракатини давом эттирган. ЙПХ ходими қоидабузар ҳайдовчининг ҳаракатини чеклаш мақсадида ўзига хизматда фойдаланиш учун бириктирилган Lacetti русумли, 01 569 VSC давлат рақам белгили хизмат автомашинасида кузатиб борган. Кўрилган чора-тадбирлар натижасида Lacetti русумли автомобиль тўхтатилган ва ҳайдовчи, 1999 йилда туғилган А.Б.га нисбатан белгиланган тартибда баённома тузилиб, транспорт воситаси вақтинча сақлаш учун жарима майдончасига жойлаштирилган», — дейилади ЙҲХББ хабарида.

Шунингдек, ЙҲХББ ижтимоий тармоқларда «ГАИ ходими фуқарони хизмат машинасида қувиб кетмоқда» сарлавҳаси остида тарқалган видео юзасидан ҳам маълумот берди.

2020 йилнинг 29 ноябрь куни ижтимоий тармоқларда тарқалган видеода аҳоли хонадонлари жойлашган кўчада ЙПХ машинаси катта тезликда ҳаракатланаётган Lacetti автомобилини қувиб кетаётганини кўриш мумкин.

Хабар берилишича, 29 ноябрь куни соат 14:20 да Тошкент шаҳар ИИББ ЙҲХБ ЙПХ ходими С.Алихонов Уйғур ва Нурафшон кўчалари кесишган чорраҳада Lacetti русумли, 01 R 233 ТА давлат рақам белгили автомобиль ҳайдовчисига тўхташ ишорасини берган. Ҳайдовчи ЙПХ ходимининг қонуний талабини бажармасдан ҳаракатини давом эттирган.

«ЙПХ ходими С.Алихонов ўзига хизматда фойдаланиш учун бириктирилган Lacetti русумли, 01 576 VSC давлат рақам белгили автомобилда Шофайз кўчаси бўйлаб Lacetti русумли автомобиль ҳаракатини чеклаш мақсадида унинг ортидан ҳаракатланиб борган», — дейилади хабарда.

ЙҲХББ хабарига кўра, ушбу ҳолат номаълум фуқаро томонидан видео тасвирга олиниб, ижтимоий тармоқларда тарқатилган. Мазкур ҳолат юзасидан Тошкент шаҳар ИИББ ЙҲХБ томонидан хизмат текшируви ўтказилмоқда.