Ўзбекистон Президенти Шавкат Мирзиёев 26 ноябрь куни Андижон вилояти Хонобод шаҳрида Life Xonobod лойиҳасини амалга ошириш тўғрисидаги фармонни имзолади.
Ҳужжатга биноан, «Янги ҳаёт» маҳалла фуқаролар йиғинининг Хонобод массивидаги қишлоқ хўжалиги ерлари ҳисобига Water Life Mineral инвестор сифатида қатнашиб, 10 гектаргача бўлган майдонни доимий фойдаланиш ҳуқуқига эга бўлади.
Лойиҳа икки босқичда амалга оширилади:
- 2020–2021 йилларда инвестор Life Xonobod бренди остида минерал ичимлик суви ишлаб чиқаришни ташкил қилади. Аҳоли ва сайёҳлар учун ичимликлар галереяси (насос хонаси), эсдалик совғалари сотиладиган дўкон, шунингдек, ўз ишлаб чиқариш маҳсулотларини намойиш қилиш учун кўргазма заллари ташкил этади. Шу билан бирга, компания ўз маблағлари ҳисобидан 14,3 миллион евро миқдорида инвестициялар киритиши ва чет эл кредитларини жалб қилиши, камида 200 янги иш ўринлари яратиши керак;
- 2022–2023 йилларда ўз маблағлари ҳисобидан 20 миллиард сўм миқдорида инвестицияларни жалб қилиш ва банк кредитларини жалб қилиш ҳамда камида 30 та янги иш ўринларини яратиш орқали замонавий дам олиш зонаси – 150 ўринли меҳмонхона мажмуасини қуриш режалаштирилган.
Шу билан бирга, инвестор томонидан инвестиция лойиҳалари ва белгиланган ижтимоий мажбуриятлар нотўғри бажарилган тақдирда, ер участкасига бўлган ҳуқуқ бекор қилинади. Кейин ушбу ер майдонида аввал белгиланган инвестиция ва ижтимоий мажбуриятлар параметрларидан кам бўлмаган янги инвестиция лойиҳасини амалга ошириш учун ажратиб берилишини таъминланади.
«Gazeta.uz»нинг корхоналар ва ташкилотларнинг ягона давлат реестри маълумотларига таяниб хабар беришича, Water Life Mineral масъулияти чекланган жамияти 2020 йил 22 апрелда Андижон вилояти Қўрғонтепа туманида рўйхатдан ўтган. Асосий фаолият тури – алкоголсиз ичимликлар, минерал сувлар ва бошқа турдаги сувларни ишлаб чиқариш. Таъсисчилар Акмалжон Икромов (68,8%), Ўткир Рўзиев (23,2%) ва Абиджан Исоқов (8%) ҳисобланади.
Аввалроқ Самарқандда лойиҳа қиймати 10 миллиард сўм бўлган ёзги ва қишки дам олиш маскани фойдаланишга топширилгани, Навоийда лойиҳа қиймати 6 млн доллар бўлган дам олиш маскани иш бошлагани ҳамда Тошкентнинг эски шаҳари «очиқ осмон остидаги музей»га айлантирилиши ҳақида хабар берилганди.
Изоҳ (0)