Қирғизистон Конституциявий кенгаши аъзоси Садирдин Тўралиев мамлакатда рус тилининг расмий мақомини бекор қилиш таклифи билан чиқди, деб ёзади «Интерфакс».

Фото: Platon-Asia

«Балки, радикалдек эшитилар, лекин мен Конституцияда давлат тили сифатида фақат қирғиз тилини қолдиришни таклиф қиламан. Қолган тиллар учун алоҳида қонунлар қабул қилиш зарур. Ёшлар қирғизча гапирмай қўйди, чунки унга эҳтиёж йўқ, бундай бўлмаслиги керак», — дейди Тўралиев.

Унинг сўзларига кўра, мамлакатда қирғиз тилини ўргатиш учун шароитлар яратиш керак. «Биз ўз тилимиздан айрилишимиз мумкин», — дейди у.

«Рус тили бизга керак, инглиз тили ҳам керак, қанча кўп хорижий тилларни билсак, чет элда бизни шунчалик ҳурмат қилишади. Дунё аҳолисининг 60 фоиздан ортиғи инглиз тилида сўзлашади. Хорижий тилларни ўрганишни ривожлантириш учун алоҳида қонунлар қабул қилиш лозим», — дея таъкидлайди Тўралиев.

Мамлакат Конституциясига кўра, қирғиз тили давлат тили ҳисобланади, расмий тил сифатида эса рус тилидан фойдаланилади.

17 ноябрь куни Қирғизистон парламенти депутатлар янги Конституция бўйича референдум ўтказиш тўғрисидаги қонун лойиҳасини жамоатчилик муҳокамасига қўйди. Референдумни 10 январь куни муддатидан олдин ўтказиладиган Қирғизистон президенти сайловлари билан бирга ўтказиш таклиф этилмоқда.

Аввалроқ «Қирғиз жўлу» жамияти раиси Қодирбек Қўшалиев Қирғизистон номини ўзгартириш таклифи билан чиққан эди.

Эслатиб ўтамиз, Қирғизистонда 4 октябрь куни парламент сайлови бўлиб ўтди. Марказий сайлов комиссиясининг дастлабки маълумотларига кўра, парламентда депутатлик ўрнига эга бўлиш учун зарур бўлган етти фоизлик довондан тўртта партия ўта олди.

15 октябрь куни Сўронбай Жээнбеков Қирғизистон президентлиги лавозимидан истеъфо берганини эълон қилди. У бош вазир Садир Жапаров ва бошқа сиёсатчилардан ўз тарафдорларини пойтахтдан олиб чиқиб кетишни сўраган ва улардан бишкекликлар тинчлигини бузмасликни илтимос қилган. 16 октябрь куни парламент мажлисида Қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди. У сайловларда иштирок этиш учун мамлакат раҳбари вазифасини бажарувчи ваколатларини 15 ноябрь куни топширди.