Вазирлар Маҳкамасининг 20 ноябрь куни «Айрим турдаги маҳсулотларни мажбурий рақамли маркировкалаш тизимини жорий этиш тўғрисида»ги 737-сонли қарори қабул қилинди, деб хабар беради Norma.
Рўйхатдан тамаки маҳсулотлари, алкоголли ичимликлар (пиводан ташқари), пиво маҳсулотлари, дори воситалари ва тиббиёт воситалари, сув ва алкоголсиз ичимликлар, маиший техникалар ўрин олган.
Давлат солиқ қўмитасига қуйидагиларни ишлаб чиқиш топширилди:
- 2020 йил 10 декабрга қадар алкоголь ва тамаки маҳсулотларини маркировкалаш ва кузатиш тартиби тўғрисидаги низомни;
- 2021 йил 30 декабрга қадар тажриба лойиҳаси якунларига кўра бошқа товарларни маркировкалаш ва кузатиш тартиби тўғрисидаги низомни.
Шунингдек, Давлат солиқ қўмитасига Ахборот технологиялари ва коммуникацияларини ривожлантириш вазирлиги билан биргаликда 2020 йил 1 декабрга қадар «Асл белгиси» маҳсулотларни маркировкалаш ва кузатиб бориш миллий ахборот тизимини (МАТ) жорий қилиш топширилган:
- айрим турдаги маҳсулотларни мажбурий маркировкалаш соҳасида ДХШ лойиҳаси концепциясини давлат-хусусий шериклик соҳасидаги ваколатли давлат органига кўриб чиқиш учун бир ҳафта муддатда тақдим этиш;
- айрим товар позицияларини маркировкалаш юзасидан жорий қилинган тажриба натижаларини ҳисобга олган ҳолда «Асл белгиси» МАТни ишлаб чиқиш, ундан фойдаланиш ва унга техник хизмат кўрсатиш учун «CПРТ Турон» МЧЖ билан биргаликда тўғридан-тўғри музокаралар асосида ДХШ битимини тузиш топширилди.
Аввалроқ Ўзбекистонда маҳсулотлар таркибидаги туз, шакар ва ёғни маркировкалаш бошлангани тўғрисида хабар берилганди.
Изоҳ (0)