Қозоғистон компаниялари Тошкентда бир қатор лойиҳаларни амалга ошириш ниятида

Тошкент ҳокими Жаҳонгир Ортиқхўжаев 24 ноябрь куни қозоғистонлик бир гуруҳ тадбиркорлар билан учрашди, деб хабар беради ҳокимлик матбуот хизмати. Улар саноат, қурилиш, тиббиёт, ландшафт дизайн ва туризм соҳасидаги инвестицион лойиҳаларни амалга оширишни муҳокама қилган.

Хусусан, Galanz Bottlers компанияси Ўзбекистонда салқин ичимликлар ишлар чиқарадиган завод қуришни режалаштирмоқда. Корхона «Махи чай» совуқ чойи, Funky, «Сок Берёза» лимонадларини, Laimon Fresh газланган ичимлигини, «Первоквас» кваси, Sevens суви каби ичимликларни ишлаб чиқаради.

«Компаниямиз Қозоғистонда 22 йилдан буён ичимликлар билан шуғулланиб келади. Биз ичимлик ишлаб чиқарувчи энг йирик учта компания қаторига кирамиз. Ҳамкорларимиз билан бу ерда ice tea (совуқ чой, шунингдек, газланган ичимлик ва сувлар ишлаб чиқарадиган завод қурмоқчимиз», — дейди компания вакили.

Бундан ташқари, Galanz Bottlers Ўзбекистондан Қозоғистонга колбаса, макарон, консерва ва қандолатчилик маҳсулотларини экспорт қилиш ниятида.

Қозоғистондаги энг йирик тозалаш компанияларидан бири бўлган IC Group эса ўз ишини аутсорсинг асосида қуриб, шаҳарни ободонлаштиришда ўзининг технологик ечимларини таклиф қилди. Компания Қозоғистондаги корпоратив, савдо ва кўнгилочар марказлар, банклар, йирик савдо тармоқларининг 27 фоиз улушига эгалик қилади ва 18,8 миллион доллар капитализацияга эга. Тошкент ҳокими пойтахт туманларидан бирида ҳамкорликдаги илк лойиҳани амалга оширишга тайёрлигини билдирган.

ТОО Тimus Development директори Тимус Нуртаев жамоат транспортларида бепул Wi-Fi жорий этиш ва туризм ва тиббиётда IТ-лойиҳаларни амалга ошириш хизматини таклиф қилди.

«Яна бир бизнес бор — бу тиббий ахборот тизимлар. Бу бир вақтнинг ўзида учта қуённи отиш имконини берадиган IТ-дастур. Соғлиқни сақлаш тизими учун аҳолининг электрон паспортини шакллантириш, статистика ва таҳлилларни қўлга киритиш мумкин бўлади. Истеъмолчи учун масофадан туриб шифокор қабулига ёзилиш, энг яқин клиника ва керакли шифокор қаерда жойлашганини билиш, керакли дори воситалари қаерда эканлигини билиш қизиқ бўлади. Шифокорларнинг шахсий кабинетига эга бўлиб, у ерда даволаш протоколлари, жумладан, COVID-19 ҳақида ёзилган бўлади», — дейди у.

Аввалроқ Қозоғистоннинг Magnum Cash&Carry савдо тармоғи бошлиғи Азамат Османов Ўзбекистон бозорига кириш ниятида эканлигини маълум қилгани тўғрисида хабар берилганди.