Океан орти юлдузлари. Европа майдонларини ёндираётган америкалик футболчилар ҳақида

Йилдан йилга АҚШда футбол оммалашиб бормоқда. MLS’да эса тобора Европанинг таниқли футболчилари кўпайиб бормоқда. Албатта, бу лиганинг оммалашиши ва ривожланишига ўз таъсирини ўтказмай қолмади. Аммо ёш иқтидорлар АҚШдан Европага жўнаб кетган ва у ерда юлдузлик даражасига кўтарилган ҳолатларни ҳам учратиш мумкин. Америка футболи эса бундан фақат ютади. Демак, қуйида Европа майдонларини ёндираётган америкалик ёш футболчилар ҳақида фикр юритилади.

Сержиньо Дест

Ёши: 20

Позицияси: ўнг қанот ҳимоячиси

Клуби: «Барселона»

«Барселона»нинг янги футболчиси Американинг бирон бир клубида ўйнамаган. Бу Дестнинг Нидерландияда туғилиб, ўша ерда футбол билан шуғулланишни бошлагани билан боғлиқ. Аммо Сержиньонинг отаси америкалик. Шу боис Дест халқаро миқёсда отасининг ватанини шарафини ҳимоя қилади. Ёш ҳимоячи ҳозиргача ўз мамлакати асосий жамоасида 5 та ўйин ўтказишга улгурди.

Дест клубдаги фаолиятини «Аякс»да бошлаган. Сержиньо саккиз йил давомида Нидерландия пойтахти клуби тизимида бўлди. Ҳимоячи «Аякс» сафида 38 учрашув ўтказиб, 2 та гол урди ва 6 та голли узатмани амалга оширди. 2020 йил октябр ойида эса Дест 21 миллион евро эвазига «Барселона»га кўчиб ўтди. Америкалик каталонияликлар сафида ҳам аллақачон 10 та ўйин ўтказишга улгурди. Испанияда Сержиньонинг истеъдоди ва маҳоратига юқори баҳо берилмоқда. Унга бошқа қитъада ўз номини чиқариш ва ватанига ҳақиқий чемпион сифатида қайтиш учун тинимсиз меҳнат ва ўсиш зарур.

Кристиан Пулишич

Ёши: 22 ёшда

Позицияси: чап қанот ярим ҳимоячиси

Клуби: «Челси»

Пулишич Европага кетишидан олдин АҚШда ўйнашга улгурганди. Футболчининг Европадаги фаолияти 2015 йилнинг февралида бошланган. У эркин агент сифатида «Боруссия Д»га ўтди. Дортмундда америкалик бир йил ичида U17 жамоасидан «арилар»нинг биринчи жамоасига ўтди. Шу тариқа Пулишич асосий жамоада 127 та ўйин ўтказиб, 19 та гол ва 26 та голли узатмага муаллифлик қилди.

2019 йилнинг январида Кристиан 64 миллион евро эвазига Лондоннинг «Челси» клубига ўтди. «Кўклар»нинг ҳозирги устози Фрэнк Лэмпард футболчини қадрлайди ва унга катта умид билдирмоқда. Америкалик жароҳатлар туфайли ҳозирча ўзининг салоҳиятини тўлиқ ишга сололганича йўқ. Бироқ Лондонда унга худди АҚШдаги каби катта ишонч билдирилади. Пулишич замонавий АҚШ терма жамоасининг энг ёрқин вакилларидан биридир. Бугунги кунга қадар вингер терма сафида 34 та ўйин ўтказиб, 14 та гол урган. Шубҳасиз, уни Европа ва ватанида яхши келажак кутмоқда.

Жованни Рейна

Ёши: 18

Позицияси: ҳужумкор ярим ҳимоячи

Клуби: «Боруссия Д»

Рейна Америка футболининг Европадаги энг катта умиди ҳисобланади. Йигитча атиги 18 ёшда, аммо у аллақачон «Боруссия Д»нинг асосий ўйинчиларидан бири. У ҳозирда Германия клуби сафида доимий ўйин амалиётига эга бўлиб келмоқда. Фаолиятини «Нью-Йорк Сити» бошлаган Жованни 2019 йилнинг ёзида эркин агент сифатида «Боруссия»га кўчиб ўтади. Ҳозирда Рейна Дортмундда жуда қадрланади. Яқиндагина клуб Жованни билан шартномани 5 йилга узайтирди. Бу эса «арилар»нинг унга узоқ вақт давомида умид қилаётганини англатади. Бу ўз навбатида унга АҚШ терма жамоасига йўл очиб беради.

Рейна ўз мамлакатининг асосий жамоасидаги дебютини 12 ноябрда ўтказди (1 та гол ҳам урди). Бундеслигада ҳам ярим ҳимоячи мунтазам равишда самарали ҳаракатлари билан ажралиб туради. Европада Жованнини топ-клублар кузатишни бошлаб юборган. Аммо Рейна ҳозирча жамоасини ўзгартирмагани маъқул. Боиси Дортмунд ёш футболчиларни қандай қилиб ривожлантириш ва уларни кейинги босқичга олиб чиқишни яхши билади.

Уэстон Маккенни

Ёши: 22

Позицияси: марказий ярим ҳимоячи

Клуби: «Ювентус»

Уэстон Маккенни «Даллас» академияси битирувчиси ҳисобланади. Уэстон 7 йилини ушбу клуб академиясида ўтказди. Аммо бу вақт ичида ярим ҳимоячи Техаснинг асосий жамоаси сафида битта ҳам учрашув ўтказмади. Шунга қарамай, ёш ярим ҳимоячи Европага йўл олди. 2016 йилнинг июль ойида Маккенни «Шальке-04»га эркин агент сифатида қўшилди. Академиядаги бир мавсумдан сўнг Уэстон асосий жамоага ўтказилди. Америкалик немис клуби таркибида 91 та ўйин ўтказиб, 5 та гол ва 7 та голли узатмага муаллифлик қилди.

2020/21 йилги мавсум бошланишидан олдин эса «Ювентус» Маккенини сотиб олиш мажбурияти билан ижарага олди. Футболчига эса омад кулиб боқди – у «Шальке-04»ни узоқ давом этадиган инқироз бошлаган бир пайтда тарк этди. Эҳтимол, Германияда ярим ҳимоячи ривожланишдан тўхтаган бўлиши мумкин эди. Италияда унинг олдида янги имкониятлар очилмоқда, Андреа Пирло ҳам уни мунтазам равишда майдонга туширмоқда. «Ювентус»да Маккеннига ривожланиш учун барча имкониятлар мавжуд. Бундан ташқари, Уэстон АҚШ миллий терма жамоасининг ўйинчиси ҳисобланади (19 та ўйин, 6 та гол).

Юнус Мусо

Ёши: 17

Позицияси: ўнг қанот ярим ҳимоячиси

Клуби: «Валенсия»

Мусо ушбу рейтингнинг энг ёш вакили. Йигитча ҳали 18 ёшга тўлмаган бўлса-да, аллақачон «Валенсия»нинг асосий ўйинчиларидан ҳисобланади. Юнус Нью-Йоркда туғилган, бироқ болалиги Италияда ўтган ва ўша ерда футбол сир-асрорларини ўрганган. 2012 йилда эса вингер Англияга йўл олади ва «Арсенал» академиясига қабул қилинди. «Канонирлар» асосий таркибида бирон марта ҳам ўйин ўтказмаган америкалик шундан сўнг, 2020 йилнинг 1 августида «Валенсия»га кўчиб ўтди.

2020 йил Юсуфнинг фаолиятидаги энг омадлиси бўлди. У ушбу йилда ўзининг профессионал футболдаги дебют ўйинини ўтказди ва гол урди. Шунингдек, у 2020 йилда ҳар бир футболчи орзу қиладиган нарсага эришди – у ўз мамлакати терма жамоасига чақирилди. Бу йигитча янги босқичларга чиқиш учун улкан имкониятларга эга. Мусо 17 ёшида дунёнинг энг кучли жамоалари ҳисобланмиш «Барселона», «Атлетико» ва «Реал» каби жамоаларга қарши ўйнамоқда.