Okean orti yulduzlari. Yevropa maydonlarini yondirayotgan amerikalik futbolchilar haqida

Yildan yilga AQShda futbol ommalashib bormoqda. MLS’da esa tobora Yevropaning taniqli futbolchilari ko‘payib bormoqda. Albatta, bu liganing ommalashishi va rivojlanishiga o‘z ta’sirini o‘tkazmay qolmadi. Ammo yosh iqtidorlar AQShdan Yevropaga jo‘nab ketgan va u yerda yulduzlik darajasiga ko‘tarilgan holatlarni ham uchratish mumkin. Amerika futboli esa bundan faqat yutadi. Demak, quyida Yevropa maydonlarini yondirayotgan amerikalik yosh futbolchilar haqida fikr yuritiladi.

Serjinyo Dest

Yoshi: 20

Pozitsiyasi: o‘ng qanot himoyachisi

Klubi: “Barselona”

“Barselona”ning yangi futbolchisi Amerikaning biron bir klubida o‘ynamagan. Bu Destning Niderlandiyada tug‘ilib, o‘sha yerda futbol bilan shug‘ullanishni boshlagani bilan bog‘liq. Ammo Serjinyoning otasi amerikalik. Shu bois Dest xalqaro miqyosda otasining vatanini sharafini himoya qiladi. Yosh himoyachi hozirgacha o‘z mamlakati asosiy jamoasida 5 ta o‘yin o‘tkazishga ulgurdi.

Dest klubdagi faoliyatini “Ayaks”da boshlagan. Serjinyo sakkiz yil davomida Niderlandiya poytaxti klubi tizimida bo‘ldi. Himoyachi “Ayaks” safida 38 uchrashuv o‘tkazib, 2 ta gol urdi va 6 ta golli uzatmani amalga oshirdi. 2020-yil oktyabr oyida esa Dest 21 million yevro evaziga “Barselona”ga ko‘chib o‘tdi. Amerikalik kataloniyaliklar safida ham allaqachon 10 ta o‘yin o‘tkazishga ulgurdi. Ispaniyada Serjinyoning iste’dodi va mahoratiga yuqori baho berilmoqda. Unga boshqa qit’ada o‘z nomini chiqarish va vataniga haqiqiy chempion sifatida qaytish uchun tinimsiz mehnat va o‘sish zarur.

Kristian Pulishich

Yoshi: 22 yoshda

Pozitsiyasi: chap qanot yarim himoyachisi

Klubi: “Chelsi”

Pulishich Yevropaga ketishidan oldin AQShda o‘ynashga ulgurgandi. Futbolchining Yevropadagi faoliyati 2015-yilning fevralida boshlangan. U erkin agent sifatida “Borussiya D”ga o‘tdi. Dortmundda amerikalik bir yil ichida U17 jamoasidan “arilar”ning birinchi jamoasiga o‘tdi. Shu tariqa Pulishich asosiy jamoada 127 ta o‘yin o‘tkazib, 19 ta gol va 26 ta golli uzatmaga mualliflik qildi.

2019-yilning yanvarida Kristian 64 million yevro evaziga Londonning “Chelsi” klubiga o‘tdi. “Ko‘klar”ning hozirgi ustozi Frenk Lempard futbolchini qadrlaydi va unga katta umid bildirmoqda. Amerikalik jarohatlar tufayli hozircha o‘zining salohiyatini to‘liq ishga sololganicha yo‘q. Biroq Londonda unga xuddi AQShdagi kabi katta ishonch bildiriladi. Pulishich zamonaviy AQSh terma jamoasining eng yorqin vakillaridan biridir. Bugungi kunga qadar vinger terma safida 34 ta o‘yin o‘tkazib, 14 ta gol urgan. Shubhasiz, uni Yevropa va vatanida yaxshi kelajak kutmoqda.

Jovanni Reyna

Yoshi: 18

Pozitsiyasi: hujumkor yarim himoyachi

Klubi: “Borussiya D”

Reyna Amerika futbolining Yevropadagi eng katta umidi hisoblanadi. Yigitcha atigi 18 yoshda, ammo u allaqachon “Borussiya D”ning asosiy o‘yinchilaridan biri. U hozirda Germaniya klubi safida doimiy o‘yin amaliyotiga ega bo‘lib kelmoqda. Faoliyatini “Nyu-York Siti” boshlagan Jovanni 2019-yilning yozida erkin agent sifatida “Borussiya”ga ko‘chib o‘tadi. Hozirda Reyna Dortmundda juda qadrlanadi. Yaqindagina klub Jovanni bilan shartnomani 5 yilga uzaytirdi. Bu esa “arilar”ning unga uzoq vaqt davomida umid qilayotganini anglatadi. Bu o‘z navbatida unga AQSh terma jamoasiga yo‘l ochib beradi.

Reyna o‘z mamlakatining asosiy jamoasidagi debyutini 12-noyabrda o‘tkazdi (1 ta gol ham urdi). Bundesligada ham yarim himoyachi muntazam ravishda samarali harakatlari bilan ajralib turadi. Yevropada Jovannini top-klublar kuzatishni boshlab yuborgan. Ammo Reyna hozircha jamoasini o‘zgartirmagani ma’qul. Boisi Dortmund yosh futbolchilarni qanday qilib rivojlantirish va ularni keyingi bosqichga olib chiqishni yaxshi biladi.

Ueston Makkenni

Yoshi: 22

Pozitsiyasi: markaziy yarim himoyachi

Klubi: “Yuventus”

Ueston Makkenni “Dallas” akademiyasi bitiruvchisi hisoblanadi. Ueston 7 yilini ushbu klub akademiyasida o‘tkazdi. Ammo bu vaqt ichida yarim himoyachi Texasning asosiy jamoasi safida bitta ham uchrashuv o‘tkazmadi. Shunga qaramay, yosh yarim himoyachi Yevropaga yo‘l oldi. 2016-yilning iyul oyida Makkenni “Shalke-04”ga erkin agent sifatida qo‘shildi. Akademiyadagi bir mavsumdan so‘ng Ueston asosiy jamoaga o‘tkazildi. Amerikalik nemis klubi tarkibida 91 ta o‘yin o‘tkazib, 5 ta gol va 7 ta golli uzatmaga mualliflik qildi.

2020/21-yilgi mavsum boshlanishidan oldin esa “Yuventus” Makkenini sotib olish majburiyati bilan ijaraga oldi. Futbolchiga esa omad kulib boqdi – u “Shalke-04”ni uzoq davom etadigan inqiroz boshlagan bir paytda tark etdi. Ehtimol, Germaniyada yarim himoyachi rivojlanishdan to‘xtagan bo‘lishi mumkin edi. Italiyada uning oldida yangi imkoniyatlar ochilmoqda, Andrea Pirlo ham uni muntazam ravishda maydonga tushirmoqda. “Yuventus”da Makkenniga rivojlanish uchun barcha imkoniyatlar mavjud. Bundan tashqari, Ueston AQSh milliy terma jamoasining o‘yinchisi hisoblanadi (19 ta o‘yin, 6 ta gol).

Yunus Muso

Yoshi: 17

Pozitsiyasi: o‘ng qanot yarim himoyachisi

Klubi: “Valensiya”

Muso ushbu reytingning eng yosh vakili. Yigitcha hali 18 yoshga to‘lmagan bo‘lsa-da, allaqachon “Valensiya”ning asosiy o‘yinchilaridan hisoblanadi. Yunus Nyu-Yorkda tug‘ilgan, biroq bolaligi Italiyada o‘tgan va o‘sha yerda futbol sir-asrorlarini o‘rgangan. 2012-yilda esa vinger Angliyaga yo‘l oladi va “Arsenal” akademiyasiga qabul qilindi. “Kanonirlar” asosiy tarkibida biron marta ham o‘yin o‘tkazmagan amerikalik shundan so‘ng, 2020-yilning 1-avgustida “Valensiya”ga ko‘chib o‘tdi.

2020-yil Yusufning faoliyatidagi eng omadlisi bo‘ldi. U ushbu yilda o‘zining professional futboldagi debyut o‘yinini o‘tkazdi va gol urdi. Shuningdek, u 2020-yilda har bir futbolchi orzu qiladigan narsaga erishdi – u o‘z mamlakati terma jamoasiga chaqirildi. Bu yigitcha yangi bosqichlarga chiqish uchun ulkan imkoniyatlarga ega. Muso 17 yoshida dunyoning eng kuchli jamoalari hisoblanmish “Barselona”, “Atletiko” va “Real” kabi jamoalarga qarshi o‘ynamoqda.