Навоий вилояти ИИБ Тергов бўлимига «Навоий Авто Савдо» ўзининг Telegram гуруҳи орқали акция ўтказиб, пуллик ютуқларни ўз эгаларига ўтказиб беришни ваъда қилиб пластик карталардаги пулларни асоссиз ечиб олганини айтиб бир неча фуқаро шикоят аризалари билан мурожаат қилган.
Келиб тушган мурожаатларни ўрганиш асносида вилоят ИИБ ТБ тезкор ходимлари томонидан жиноят иши қўзғатилиб, суриштирув ишлари олиб борилган. Аниқланишича, тергов ҳужжатларида исми шарифи келтирилган 25 ёшли фуқаро Ҳ.Ш. Telegram мессенжерида автомобиль савдоси билан шуғулланувчи компанияларнинг номидан фойдаланиб автомашина сотиб олмоқчи бўлган 20 дан ортиқ фуқарони чув туширган.
Маълум бўлишича, қарийб 20 миллион сўмга яқин маблағларни ўз эҳтиёжи йўлида сарфлаб юборган шахс дастлаб, ўзини «Навоий Авто Савдо» МЧЖнинг ходими деб таништириб, Telegram’даги гуруҳида мавжуд фойдаланувчиларга смс хабарномалари жўнатиш орқали фуқароларнинг ишончига кириб, компания томонидан акция бўлаётганлигини, унда ғолиб бўлганларга 300 000 сўмдан 1 700 000 сўмгача бўлган пул ютуқлари фақатгина пластик карталарга ўтказиб берилишини айтади.
Мижозларга тегишли бўлган пластик карта маълумотларини ва сир сақланиши керак бўлган махфий кодларни қўлга киритгач катта миқдордаги пул маблағларини ечиб олади.
Тезкор суриштирувларда ушбу жиноятни содир этган шахс асли Қизилтепа туманида яшовчи фуқаро Ҳ.Ш. бўлиб, Бухоро вилояти ҳудудида эканлиги аниқланди ва Бухоро вилояти ИИБ ходимлари томонидан гумонланувчи сифатида қўлга олинди.
Айни пайтда мазкур ҳолат юзасидан Навоий, Зарафшон шаҳри ҳамда Бухоро вилояти ИИБ ТБ томонидан тергов ишлари олиб борилмоқда ва унга нисбатан қамоққа олиш эҳтиёж чораси кўрилган.
Аввалроқ Гулистонда фуқароларга 1100 доллар эвазига C ва E тоифадаги ҳайдовчилик гувоҳномаларини олиб беришни ваъда қилган шахс, Бухорода ер майдони ажратиш эвазига тадбиркордан 22,5 минг доллар пора олган шахслар ҳамда трансформатор ўрнатиб бериш эвазига 3800 доллар сўраган «Андижон ҳудудий электр тармоқлари» ходими қўлга олингани ҳақида хабар берилганди.
Изоҳ (0)