Илон Маск миллиардерлар рейтингида Билл Гейтсдан ҳам ўзиб кетди

SpaceX космик компанияси асосчиси ва Tesla бош директори Илон Маск Bloomberg версияси бўйича сайёранинг энг бой кишилари рейтингида иккинчи ўринга кўтарилди, деб ёзади «РБК».

Агентлик Маскнинг бойлигини 127,9 миллиард долларга баҳоламоқда. Бир йил ичида у 100,3 миллиард долларга кўпайган — бу рейтинг иштирокчилари ичида энг катта ўсишдир.

Миллиардер рейтингда бойлиги 127,7 миллиард долларга баҳоланаётган Билл Гейтсдан ўзиб кетди. Биринчи ўринда эса ҳамон катта фарқ билан Amazon корпорацияси раҳбари Жефф Безос турибди (182 миллиард доллар).

Forbes’нинг миллиардерлар рейтингида Маск тўртинчи ўринни эгалламоқда (110,4 миллиард доллар). Журнал версияси бўйича дунёнинг энг бадавлат одамлари учлигига Безос (181,3 миллиард доллар), Louis Vuitton Moët Hennessy раҳбари Бернар Арно (140,4 миллиард доллар) ва Гейтс (118,5 миллиард доллар) киради.

Аввалроқ Илон Маск Bloomberg’нинг миллиардерлар глобал рейтингида учинчи ўринга чиқиб олиб, Марк Цукербергдан ўзиб кетган эди.

Tesla кетма-кет беш чоракдан буён сердаромад компания сифатида етакчилик қилмоқда. Ўтган ҳафта S&P Dow Indices 21 декабрь куни электромобиллар ишлаб чиқарувчининг акциялари S&P 500 индексига киришини эълон қилди. Ушбу янгилик фонида тўрт савдо куни ичида Tesla акциялари 20 фоизга қимматлашди, бир йил ичида эса улар 485 фоизга ошди. 23 ноябрь кунги савдолар ёпилиши вақтига келиб, компания қимматли қоғозлари 6,58 фоизга қимматлашиб, битта акциянинг нархи 521,85 долларга етди.

Шунингдек, Илон Маскнинг бойлиги бир ҳафта давомида 13,5 миллиард долларга ўсгани ҳақида ҳам хабар берилди.