Elektr ta’minoti bilan bog‘liq, aholining keskin noroziligiga sabab bo‘layotgan vaziyatni “qandaydir tartib”ga olish kerak. Bu haqda samarqandlik senator Farmon Toshev Senatning 9-yalpi majlisida parlament yuqori palatasi rahbari Tanzila Norboyevaga qilgan murojaatida aytib o‘tdi.

Farmon Toshev.

Foto: Madina Nurman / “Daryo”

Senatorning qayd etishicha, internetni ochib qarasang, hammayoqda bitta shikoyat — “elektr yo‘q, elektr o‘chgan”.

Samarqandda ham shu ahvol. Biz hozir Senatning yig‘ilishida shunga e’tibor qilmasak, hozir gapirmasak, u idoraning odamlari gapiradiganga o‘xshamaydi.

Shuning uchun ularning idorasiga iltimosim bor edi — nima uchun ko‘p gaplarni xalqqa oldinroq aytish mumkin emas, grafigini ishlab chiqish mumkin emas, nima uchun o‘zining odamlari orqali joylarga borib tushuntirish mumkin emas?

Axir, o‘zingiz o‘ylab ko‘ring, hozir sizning Telegram’ingizga ham savol tushsa, ular orqali javob beryapsiz-ku! Xalqqa nima deymiz biz har kuni? Agar jo‘nataversak, jo‘nataversak, bu ham, menimcha, yaxshilikka olib bormaydi.

U odamlarning vakillari bizga kelganda hammaning oldida so‘z bergan, “Yo‘q, bizda svet o‘chmaydi, yetarli hamma narsa, hamma narsa kommunizm bo‘ladi”, degandi. Kechirasiz-u, hozir shaharning o‘zida, mening uyimda ham necha martalab o‘chyapti svet.

Bu narsalarni qandaydir tartibga olish kerak. Saylov okrugiga borganda qiynalib qolyapman.

Farmon Toshev, Oliy Majlis Senati a’zosi 

Avvalroq Samarqand viloyatining 25 foiz iste’molchisi yarim kechada elektr ta’minotidan uzilib qolgani haqida xabar berilgan edi. Qayd etish joiz, Senat 9-yalpi majlisining YouTube’dagi jonli efiri foydalanuvchilarning elektr va gaz ta’minotidagi muammolar haqidagi murojaatlariga to‘lib ketgan.