Mercedes, Adidas, хайриялар ва ўйнамай топилаётган миллионлар. Месут Ўзилнинг ҳашаматли ҳаёти ҳақида

Лондоннинг «Арсенал» клуби жамоа ярим ҳимоячиси Мезут Ўзилни Европа Лигаси ва Англия Премьер Лигаси ўйинлари қайдномасига киритмади. Ушбу ҳолатда Ўзил камида февраль ойигача расмий ўйинларда қатнаша олмайди. Бу ерда яна бир эътиборга молик жиҳат шундаки, Месут клубнинг энг кўп маош (ҳафтасига 350 минг евро) олувчи футболчиси ҳисобланади. Яъни, «Арсенал» фақат машғулот ўтказаётгани учунгина Ўзилга ҳафтасига 350 минг фунт тўлайди. Хўш, асли турк миллатига мансуб бўлган германиялик футболчи ушбу ўйнамай топилаётган маблағларни нималарга сарфлайди? Қуйида шу ҳақида батафсил ҳикоя қиламиз.

Ўзил қаерда яшайди?

Месут Лондоннинг шимолий қисмида жойлашган 10 миллион фунтлик ҳашаматли уйда ҳаёт кечиради. Уй жуда кенг, унда нақ 6 та ётоқхона мавжудлиги ҳам бунга исбот бўла олади.

Айтишларича, Месут ўзининг туркий илдизларини унутмаган ва бутун уйнинг ички қисмини миллий элементлар билан безаган. Шунингдек, уйда катта кинотеатрни ҳам учратиш мумкин.

Ўзил қандай машиналарда юради?

Ўзилнинг ғилдиракли аравалари ҳақида гап кетганда, Месут Mercedes компанияси билан шахсий шартномага эга. Шу туфайли у фақат ушбу компания машиналаридан фойдаланиши мумкин.

Хусусан, унинг автопаркида Mercedes SLS AMG (165 минг фунт), Mercedes S65 AMG (183 минг фунт) ва бир қанча бошқа Mercedes’ларни кўриш мумкин. Таъкидлаш жоиз, Ўзил «Реал» футболчиси бўлган маҳал имзоланган шартномага кўра Audi Q7 ва RS5’ни совға сифатида қабул қилиб олган.

Ўзилнинг оиласи

2017 йилда Месут Амине Гулше исмли қиз билан яқин муносабатларга киришади ва 2019 йилда жуфтлик тўй маросимини ўтказади. Амине 2014 йилда Туркиянинг энг гўзал қизи совринига сазовор бўлган. Амине модель сифатида фаолият юритади. 2020 йилнинг март ойида эса Ўзил илк марта ота бўлди. Жуфтлик туғилган қизалоқни Эда деб аташга қарор қилди.

Ўзил футболдан ташқари яна нималарга қизиқади?

Автомобильллар иштиёқманди бўлган Ўзил бўш вақтларида айнан машина ҳайдашни ёқтиради. Шунингдек, у автотрекларга ҳам чиқиб туришни канда қилмайди. Месутнинг яна бир севимли машғулотларидан бири, бу шахмат. Ана энди унинг нима сабабдан майдонда бу қадар ақл билан ҳаракат қилиши аёнлашмоқда. Бундан ташқари, футболчи мунтазам равишда хайрия ишлари билан шуғулланади, бетоб болаларга ёрдам кўрсатади ва уларни футбол ўйинларига олиб келиб боради.

Ўзилнинг даромади қанча?

Ўзил «Реал»нинг энг яхшиларидан бири эди (йилига 5 миллион евро оларди), аммо у бунга қаноат қилмай «Арсенал»га ўтиб кетди. Лондон клубида эса плеймейкер юқорида айтиб ўтилганидек ҳафтасига 350 минг фунт олади. Шунингдек, у яқиндагина клубга бўлган садоқати учун ҳам 8 миллион фунт билан мукофотланди. Шунингдек, Месут рекламалар орқали ҳам яхшигина даромад кўради. Бунга унинг Adidas ва Mercedes компаниялари билан тузган шартномаси яққол мисол бўла олади.