UFC президенти Дэйна Уайт енгил вазн тоифаси вакиллари Конор Макгрегор ва Дастин Порье ўртасидаги жанг камар учун кечмаслигини маълум қилди.
Макгрегор ва Порье чемпионлик камари учун жанг қиладими, дея сўралган саволга Уайт қуйидагича жавоб берди.
«Йўқ. Ҳабиб қайтади. Ишончим комил, у жанг қилади. Уларнинг жанги камар учун кечмайди», — дейди Уайт.
Конор Макгрегор ва Дастин Порье ўртасидаги жанг 2021 йилнинг 23 январида бўлиб ўтади. Бу Конор ва Порье ўртасидаги иккинчи жанг бўлади. 2014 йилги UFC 178 мусобақасида Конор рақибини нокаутга учратганди.
Эслатиб ўтамиз, 24 октябрь куни Абу-Дабидаги (БАА) «Жангчилар ороли»да бўлиб ўтган мусобақа асосий жангида Ҳабиб Нурмагомедов ва Жастин Гэтжи ўзаро тўқнаш келди. Унда россиялик спортчи иккинчи раундда рақибига бўғиш усулини қўллаб ғалаба қозонди. Жангдан кейин Ҳабиб фаолиятини якунлашини маълум қилди.
Бу ғалаба орқали Ҳабиб учинчи марта камарини ҳимоя қилди. Ундан аввал у Конор Макгрегор ва Дастин Порьени таслим этганди. Жангдан сўнг россиялик яккакурашчи фаолиятида илк бор промоушен умумий рейтингида биринчи ўринга кўтарилди.
Изоҳ (0)