UFC prezidenti: “Konor va Porye kamar uchun jang qilmaydi. Habib qaytadi”

UFC prezidenti Deyna Uayt yengil vazn toifasi vakillari Konor Makgregor va Dastin Porye o‘rtasidagi jang kamar uchun kechmasligini ma’lum qildi.

Makgregor va Porye chempionlik kamari uchun jang qiladimi, deya so‘ralgan savolga Uayt quyidagicha javob berdi.

“Yo‘q. Habib qaytadi. Ishonchim komil, u jang qiladi. Ularning jangi kamar uchun kechmaydi”, — deydi Uayt.

Konor Makgregor va Dastin Porye o‘rtasidagi jang 2021-yilning 23-yanvarida bo‘lib o‘tadi. Bu Konor va Porye o‘rtasidagi ikkinchi jang bo‘ladi. 2014-yilgi UFC 178 musobaqasida Konor raqibini nokautga uchratgandi.

Eslatib o‘tamiz, 24-oktabr kuni Abu-Dabidagi (BAA) “Jangchilar oroli”da bo‘lib o‘tgan musobaqa asosiy jangida Habib Nurmagomedov va Jastin Getji o‘zaro to‘qnash keldi. Unda rossiyalik sportchi ikkinchi raundda raqibiga bo‘g‘ish usulini qo‘llab g‘alaba qozondi. Jangdan keyin Habib faoliyatini yakunlashini ma’lum qildi.

Bu g‘alaba orqali Habib uchinchi marta kamarini himoya qildi. Undan avval u Konor Makgregor va Dastin Poryeni taslim etgandi. Jangdan so‘ng rossiyalik yakkakurashchi faoliyatida ilk bor promoushen umumiy reytingida birinchi o‘ringa ko‘tarildi.