Енгил вазн тоифасида UFC чемпиони Ҳабиб Нурмагомедовнинг амакиси Нурмагомед Нурмагомедов жияни ўз фаолиятини яна тиклашига умид қилишини айтди.
«Ҳабиб фаолиятини тугатишига қарши эдим. Мен унинг қарорига қарши чиққан ягона киши эдим, бироқ Ҳабиб — мустақил одам, унинг ўзи қарор қабул қилади. Мен ҳозир ҳам қаршиман. Ҳабиб ҳали жанг қила олади.
Унинг қайтиши ҳақида гапирсам, ҳамма нарса бўлиши мумкин, бироқ бу унинг шахсий қарори бўлади. Ҳабибнинг қайтишини ва бир эмас, бир нечта жангда иштирок этишини истайман. Мен шундай фикрдаман, Ҳабиб бошқа фикрда, унинг онаси эса буткул ўзгача фикрда», — дейди Нурмагомедов.
Эслатиб ўтамиз, 24 октябрь куни Абу-Дабидаги (БАА) «Жангчилар ороли»да бўлиб ўтган мусобақа асосий жангида Ҳабиб Нурмагомедов ва Жастин Гэтжи ўзаро тўқнаш келди. Унда россиялик спортчи иккинчи раундда рақибига бўғиш усулини қўллаб ғалаба қозонди. Жангдан кейин Ҳабиб фаолиятини якунлашини маълум қилди.
Бу ғалаба орқали Ҳабиб учинчи марта камарини ҳимоя қилди. Ундан аввал у Конор Макгрегор ва Дастин Порьени таслим этганди. Жангдан сўнг россиялик яккакурашчи фаолиятида илк бор промоушен умумий рейтингида биринчи ўринга кўтарилди.
Изоҳ (0)