Yengil vazn toifasida UFC chempioni Habib Nurmagomedovning amakisi Nurmagomed Nurmagomedov jiyani o‘z faoliyatini yana tiklashiga umid qilishini aytdi.
“Habib faoliyatini tugatishiga qarshi edim. Men uning qaroriga qarshi chiqqan yagona kishi edim, biroq Habib — mustaqil odam, uning o‘zi qaror qabul qiladi. Men hozir ham qarshiman. Habib hali jang qila oladi.
Uning qaytishi haqida gapirsam, hamma narsa bo‘lishi mumkin, biroq bu uning shaxsiy qarori bo‘ladi. Habibning qaytishini va bir emas, bir nechta jangda ishtirok etishini istayman. Men shunday fikrdaman, Habib boshqa fikrda, uning onasi esa butkul o‘zgacha fikrda”, — deydi Nurmagomedov.
Eslatib o‘tamiz, 24-oktabr kuni Abu-Dabidagi (BAA) “Jangchilar oroli”da bo‘lib o‘tgan musobaqa asosiy jangida Habib Nurmagomedov va Jastin Getji o‘zaro to‘qnash keldi. Unda rossiyalik sportchi ikkinchi raundda raqibiga bo‘g‘ish usulini qo‘llab g‘alaba qozondi. Jangdan keyin Habib faoliyatini yakunlashini ma’lum qildi.
Bu g‘alaba orqali Habib uchinchi marta kamarini himoya qildi. Undan avval u Konor Makgregor va Dastin Poryeni taslim etgandi. Jangdan so‘ng rossiyalik yakkakurashchi faoliyatida ilk bor promoushen umumiy reytingida birinchi o‘ringa ko‘tarildi.
Izoh (0)