Xorazmda noqonuniy ov qilgan hokim o‘rinbosari va IIB xodimi ushlangani to‘g‘risida xabar berilgandi. Tuproqqal’a tumani hokimligi axborot xizmatining ma’lum qilishicha, noqonuniy ov qilgan hokim o‘rinbosari Shuhrat Shomurodov 19-oktabr kuni o‘z arizasiga binoan vazifasidan ozod etilgan.
16-oktabr kuni tungi soat 02:00 larda 9203-harbiy qism chegara xodimlari bilan viloyat Ekologiya va atrof-muhitni muhofaza qilish boshqarmasi xodimlari tomonidan o‘tkazilgan ekologik nazorat tadbiri davomida Xorazm viloyatining Turkmaniston bilan chegaradosh Tuproqqal’a tumani, “Tuproqqal’a” mahallasi chegaraoldi hududida 4 nafar fuqaro chegaraoldi hududlarida bo‘lish rejimini hamda ov qilish va baliq ovlash qoidalarini buzib, noqonuniy ov qilgani aniqlangan.
Ta’kidlanishicha, shu vaqtda “Tuproqqal’a” mahallasidagi ekin maydonlarida, sholi hosili yig‘im terimini nazorat qilib yurgan Tuproqqal’a tuman hokimining qishloq xo‘jaligi bo‘yicha o‘rinbosari Shuhrat Shomurodov va IIB xodimi chegara xodimlari ov qilib yurgan fuqarolarni ushlab turganligini ko‘rib, chegara xodimlariga yordam berish maqsadida ularga yaqin borgan. Shunda 9203-sonli harbiy qism chegara xodimlari ularni ham chegara postiga olib borib, ularga nisbatan chegara zonasiga kirish qoidasini buzganliklari haqida ma’muriy bayonnoma tuzilib sud jarayoniga tegishli hujjatlar bilan taqdim qilingan.
Tuproqqal’a tuman hokimining qishloq va suv xo‘jaligi bo‘yicha o‘rinbosari 19-oktabrdan binoan o‘z arizasiga ko‘ra egallab turgan lavozimidan ozod etilgan.
“Qo‘shimcha ma’lumotlar to‘plangan hujjatlar asosidagi sudning qonuniy kuchga kirgan qaroridan keyin ma’lum qilinishi kutilmoqda”, — deyiladi xabarda.
Avvalroq Buxoroda noqonuniy tarzda o‘rdak ovlagan shaxslar jarimaga tortilgani to‘g‘risida xabar berilgandi.
