Россия президенти Владимир Путин Майя Сандуни Молдова президенти сайловларидаги ғалабаси билан табриклади, деб ёзади «РБК» Кремль матбуот хизматига таяниб.

Фото: «ТАСС»

«Сизнинг давлат раҳбари лавозимидаги фаолиятингиз мамлакатларимиз ўртасидаги алоқаларнинг конструктив ривожланишига имконият яратишига умид қиламан», — дейилади Россия етакчисининг табрик телеграммасида.

Шунингдек, Молдованинг амалдаги президенти Игорь Додон ҳам «Ҳаракат ва бирдамлик» партияси етакчиси Майя Сандуни ғалаба билан қутлади.

«Дастлабки натижаларга кўра, менинг рақибим Майя Санду ғалаба қозонди. Бунда гап дастлабки натижалар ҳақида бормоқда. Ва мен уни бу билан табрикламоқчиман», — деди Додон брифингда.

Эслатиб ўтамиз, Молдовада ўтказилган президентлик сайловларининг иккинчи турида 97,29 фоиз бюллетенлар ҳисоби бўйича 54,04 фоиз овоз билан мамлакат собиқ бош вазири ва «Ҳаракат ва бирдамлик» мухолифат партияси етакчиси Майя Санду ғолибликни қўлга киритмоқда. Молдованинг амалдаги президенти Игорь Додон тахминан 45,97 фоиз овоз тўплаган.

Овозларнинг қарийб 100 фоизи ҳисоблаб чиқилганидан кейин эса, МСК маълумотлари бўйича, Санду овозларнинг 57,74 фоизини, амалдаги президент — 42,26 фоизини қўлга киритган. Сайловда сайловчиларнинг 50 фоиздан зиёди қатнашган.

Санду Европа иттифоқи билан интеграция, Руминия ва Украина билан муносабатларни яхшилаш тарафдори. Шунингдек, у Приднестроведаги низо ҳудудидан Россия ҳарбийлари олиб чиқиб кетилишини қўллаб-қувватламоқда.

Молдовада президентлик сайловларининг биринчи тури 2020 йил 1 ноябрь куни бўлиб ўтган. Унда Додон 32,74 фоиз натижа билан Сандудан ортда қолган эди (унда 35,96 фоиз овоз).

Молдовада президентлик сайловларини ўтказиш 2019 йилнинг июнида республиканинг Конституциявий суди Додонни депутатлар сўрови бўйича лавозимидан четлаштиргач белгиланган эди. Бу 2016 йили Додон президент этиб сайланганидан буён олтинчи маротаба четлаштириш ҳисобланади.