Арманистон Миллий хавфсизлик хизмати собиқ раҳбари Никол Пашинянни ўлдиришга тайёрланишда гумон қилинди
Арманистон Миллий хавфсизлик хизмати собиқ раҳбари, «Айреник» партияси етакчиси Артур Ванецян Арманистон бош вазири Никол Пашинянни ўлдиришга тайёрланишда гумон қилиниб қўлга олинди, деб ёзади Meduza.
Ванецян, шунингдек, ноқонуний қурол айланишига алоқадорликда ва ҳукуматни тортиб олишга тайёрланишда ҳам гумон қилинмоқда. Бу ҳақда унинг адвокати Лусине Саакян Facebook’да маълум қилган.
«Ҳукуматнинг мамлакат ичида сиёсий мухолифатчиларни бостириш мақсадидаги ‘ижодкорлик’кагина қодир бўлган фикр-хаёл парвози шу даражага етдики, энди улар ҳукуматни ўзлаштириш ва Никол Пашинянни ўлдиришга тайёргарлик кўриш айбловини ўйлаб топди», — деб ёзди у.
Кейинроқ Арманистон Миллий хавфсизлик хизмати Никол Пашинянга нисбатан суиқасд олди олинганини маълум қилди. Гумонланувчилардан бири Артур Ванецян бўлди.
Аввалроқ Арманистон Махсус тергов хизмати Ереванда оммавий йиғилишларни ноқонуний ташкил этиш бўйича жиноий иш доирасида мухолифатнинг 10 нафар раҳбари қўлга олинганини маълум қилган эди.
Эслатиб ўтамиз, Ереванда 10 ноябрдан буён оммавий норозиликлар давом этмоқда. Бунга Арманистон бош вазири Никол Пашинян Тоғли Қорабоғдаги урушни тугатиш тўғрисидаги битимни имзолагани сабаб бўлган. Битимга кўра Тоғли Қорабоғ ҳудудининг қарийб ярми Озарбайжон назоратига ўтади. Намойишчилар келишувни «сотқинлик» деб атаган ва уни имзолаган Пашинян истеъфосини талаб қилмоқда.
Пашиняннинг ўзи ушбу битимни имзолашдан бошқа чораси қолмаганини айтган. Унинг фикрича, Арманистон жанговар ҳаракатларни давом эттирганида, нафақат Тоғли Қорабоғ пойтахти Степанакертни, балки бутун Тоғли Қорабоғни қўлдан чиқарган, минглаб ҳарбий хизматчилар қуршовда қолиб кетган бўларди.
«Ватан» мухолифат партияси етакчиси Артур Ванецян Арманистон Тоғли Қорабоғда ўт очишни тўхтатиш тўғрисидаги битим шартларини мамлакатда ҳукумат алмашганидан сўнг ўзгартириши мумкинлигини маълум қилган.
