Андижон ҳокимининг яна бир аудиоси тарқалди. Унда ҳоким тадбиркорларни «шаҳардаги шакал» деб атаган

Ижтимоий тармоқларда Андижон вилояти ҳокими Шуҳрат Абдураҳмоновнинг навбатдаги аудиоси тарқалди, дея хабар бермоқда «Xabar.uz».

«Кечагина тадбиркорларни тўплаб, шу бўйича йиғилиш қиляпмиз. Тошкентдан Адҳам Икромов (Савдо-саноат палатаси раиси) келган, биргалашиб йиғилиш ўтказяпмиз. У тушунтиряпти: энди ундай бўлади, бундай бўлади, ишилар бўлса, мана шунга мурожаат қиласизлар, мана номер 1100, деб телефон қилиб, мисоллар келтириб тушунтиряпти. Борми мурожаат қиладиган деса, учтаси қўл кўтаряпти.

Кейин меники қўзиб кетади-ку. «Тур ўрнингдан. Нима мурожаатинг бор?» десам, «Ҳа энди» дейди. «Айт энди, ҳа энди демасдан» дедим. У тушунмай қўлини кўтариб юборибди-да. «Айт, ҳозир айтасан» дедим, «Андижон шаҳридаги шакал, айтасан» десам, «Ҳа энди» деяпти.

Ёки билмай кўтариб юборган ёки ҳақиқатдан нимадир бор. «Эшитвол, ҳаммаси бош вазирга боргани билан менга келади» дедим. «У ер орқали келса, кетингга тепаман ё қизияптими?» дедим. У «Тушунмай қўл кўтариб юборибман» деди. Иккита сассиқнинг гапи билан ҳеч нима ўзгармайди», – дейди Андижон ҳокими.

Aудио давомида ҳоким номаълум шахсларга қарата: «Сенларни одам туққанми ё ит туққанми? Э, семирмай ўл, тўнғиз!», – деган.

Эслатиб ўтамиз, 13 ноябрь куни интернетда Андижон вилояти ҳокими унга «сассиқ гапирган» марҳаматлик уч аёлни 15 суткага қаматгани ҳақида гапирган аудиоси тарқалганди. Вилоят ҳокимлиги аудио 2 йил аввал ёзиб олинганини маълум қилган.

Ушбу ҳолатга депутат Расул Кушербаев муносабат билдириб, ҳокимни «Ленин бошлаган бошқарувнинг содиқ вориси» деб атаган.