Ҳиндистоннинг Уттар-Прадеш штатида жиноятчининг саводсизлиги полицияга содир этилган бола ўғирлигини очишда ёрдам берди. Бу ҳақда Times of India хабар беради.
2020 йилнинг 26 октябрь куни Хардой шаҳрида яшовчи 8 яшар болакай бувисиникига кетаётиб йўқолиб қолган. Худди шу куни боланинг ота-онасига ўғирлаб кетувчи томонидан смс-хабар келган. «Ситапурга 200 минг рупий (салкам 2700 доллар) олиб келинг», − дейилади хабарда. – «Полицияга хабар берманг, акс ҳолда ўғлингиз ўлдирилади». Матнда «Ситапур» ва «полиция» сўзлари хато ёзилган.
Кейинчалик бола ўлдирилган ҳолда топилган. 4 ноябрь куни унинг қариндошлари ҳуқуқни муҳофаза қилиш идораларига мурожаат қилган. Дастлаб телефон рақами эгаси гумон қилинган, аммо у ўқишни ва ёзишни ҳам билмайдиган одам бўлиб чиқди.
Полиция ишлашда давом этиб, тез орада жиноятга алоқадор бўлиши мумкин бўлган яна 10 кишини ҳибсга олган. Гумон қилинувчилар орасидан жиноятчини топиш мақсадида улардан телефон қурилмасида «полиция» ва «Ситапур» сўзлари қатнашган матн ёзиш талаб қилинган.
Шунда гумонланувчилардан бири худди смс-хабардаги хатоларга йўл қўйган. Маълум бўлишича, у ўғирлаб кетилган боланинг узоқ қариндоши. У бола ўғирлаш ва ўлдиришда айбланиб, ҳибсга олинган.
Изоҳ (0)